Ajo bëri bujë me lënien e Amerikës, aty ku kishte ndërtuar jetën e karrierën e saj, duke qenë aty që në vogëli, për të kontribuuar me dijen dhe përvojën në Shqipëri.
Rudina Seseri, me ardhjen e saj në Shqipëri në 2008-ën, duke u angazhuar me PS-në, ishte një prej atyre që mishëroi “kthimin e trurit” shqiptar në atdhe, për t’i mundësuar këtij të fundit mbrothësinë e ëndërruar. Por nuk ia doli. Edhe pse u zgjodh deputete, pa mundur ta provojë veten në kushte qeverisjeje, ajo u largua sërish drejt Amerikës. Bëhet fjalë për pas 2009-ës, kur PS-ja vijoi opozitën.
Seseri, gjatë një prononcimi për VOA-n në lidhje me suksesin në karrierën e saj si menaxhere, foli dhe për këtë përvojë të kaluar, e cila sigurisht ka vulën e dështimit, gjersa zgjodhi të largohet sërish nga Shqipëria. Po pse?
“Ishte mundësia ime për të dhënë diçka mbrapsht, ishte mundësia ime në ato momente për t’i vënë një kapak, për të thënë çfarë është realiteti, për të kontribuar”, tha Seseri, ku, konfuze gjithsesi në shpjegim, sipas komentit të VOA-s, idealizimi me të cilën kishte ushqyer veten në lidhje me Shqipërinë dhe realiteti i kësaj të fundit, e bën që të mos ia dalë dot.
“Frika ime më e madhe ka qenë dhe vazhdon të jetë që unë sa më shumë kohë kaloj këtu, kam frikë se humbas kontekstin lokal, jo për të kuptuar problemet, jo madje edhe për të kuptuar se si mund të shkohet në rrugën e zgjidhjes, por aftësinë për të manovruar. Më bëjnë përshtypje gjëra që do t’i bënin një të huaji, që është paksa e padrejtë, por gjithashtu realiste.”, komentoi Seseri.
Edhe në gjykimin ndaj Ramës, njeriut që e solli nga SHBA, ajo ka një vlerësim ambig, duke konkluduar se është njeri i vështirë.
“Pikëpamja ime mbi rolin e Ramës është që Shqipëria për aftësitë që ka, për botëkuptimin krejt ndryshe, me të mirat dhe të këqiat që vijnë me të, jemi të gjithë paketë përfshirë dhe Ramën, si individ. Gjithmonë e kam thënë që kur erdhi në fuqi që Shqipëria është vetëm një ndalesë. Rama ka një kombinim të pazakontë kreativiteti, aftësie për të ekzekutuar dhe vizioni dhe ato e bëjnë njeri si të vështirë për të dhënë e për të marrë, por gjithashtu dikush që mund të ketë impakt përtej të natyrshmes ose çfarë mund të presësh nga një udhëheqës rutinë.”, tha Seseri.
Sipas saj, vetëm situata pas tërmetit do jetë shansi i madh i Ramës për të treguar veten.
“Trashëgimia që do të lërë Rama mbrapa nuk janë arritjet dhe mosarritjet e asaj që ka ndodhur deri tani, është çfarë ndodh në pikëpamjen time nga ky moment dhe tutje, sepse ka mundësinë ta transformojë vendin, në një formë shumë më të madhe, shumë më afatgjatë dhe me impakt më të gjerë”, konkludon Seseri. /tesheshi.com/
