Nga Lulzim Toçi
Abuzimi me fëmijët në Jetimoren e Shkodrës daton vite më parë dhe nuk është një fenomen i muajve të fundit.
Një ish-pjesëtar i kësaj jetimoreje, tashmë i rritur, rrëfen rastin e abuzimit me një vajzë të atyshme me inicialet Xh.N (që shfaqet dhe në foto), e që i përket vitit 2012, më saktë shtatorit të këtij viti.
Ai thotë se kujdestari Sokol S. përdhunonte prej disa kohësh fëmijën Xh. N., pra njërën nga vajzat e qendrës, madje dhe duke e lidhur.
Dhe pas zbulimit të këtij rasti flagrant, deri dhe mizor, drejtori i jetimores, së bashku me kujdestarët e tjerë vendosin të mos e bëjnë publike duke e kuçur brenda mureve atë çfarë kishte ndodhur.
Sa për kujdestarin, drejtori kishte marrë masën e pezullimit nga detyra dhe jo atë të kallëzimit penal.
Kjo, dhe për arsyen se kujdestari kishte qenë edhe vetë i rritur në atë qendër si jetim.
Por ndërkohë, siç rrëfen ish-pjesëtari i Jetimores së Shkodrës, tashmë famëkeqe, për vajzën e përdhunuar nuk ndërrmor asnjë ndihmë, qoftë edhe nga psikologja e qendrës, e cila sipas tij ishte e mpleksur në një raport intim me vetë drejtorin.
“Ankesat e fëmijëve binin në vesh të shurdhët”, thotë ai, i cili sqaron se fati i vajzës së përdhunuar do përfundonte edhe më keq se kaq, pasi pas largimit nga jetimorja, Xh. N., sipas motrës së saj po ashtu jetime e rritur në këtë qendër, ka përfunduar si prostitutë në rrugët e Kosovës.
Ish-fëmija i Jetimores së Shkodrës, thotë se aty dhuna e ushtruar mbi jetimët ka qenë diçka sistematike. Ndërsa nga ana tjetër, thotë ai, i gjithë personeli ishte vetëm i interesuar si të vjedhë diçka nga fondet e qendrës.
Si personin më pozitiv në atë jetimore ai veçon një tjetër Sokol, atë me mbiemrin Murati, që sipas tij ishte i vetmi prind plot përkujdesje që këta fëmijë kishin patur në atë qendër. /tesheshi.com/
