Michel Platini, ish-kreu i UEFA-s ka deklaruar se Botërori ‘98 në Francë ka pasur parregullsi në short, në mënyrë që Franca dhe Brazili të mos takoheshin me njëra-tjetrën përveçse në finale.
Në një rrëfim në emisionin Stade Bleu, Platini tha se “finalja Francë-Brazil ishte një ëndërr për të gjithë”.
“Sipas rregullores së FIFA-s, vendi organizator i Botërorit e ka të sigurt vendin e parë në vazon e parë para hedhjes së shortit të grupeve, ndërsa shtatë kokat e tjera të grupeve zgjidhen automatikisht. Brazili dhe Franca u vendosën pa short në grupin A dhe C respektivisht, e duke qenë se kalendari deri në finale ishte i organizuar që më parë, përballja ishte shmangur. Nëse ne e mbyllnim grupin në vend të parë dhe Brazili gjithashtu, atëherë nuk do të mund të ndesheshim përveçse në finale. Mendoni se të tjerët nuk e bënë këtë në Botërorët e tyre? Franca kundër Brazilit në finale, ishte ëndrra e të gjithëve”, ka rrëfyer Platini, një prej ikonave të futbollit francez ne vite, që i përket brezit të shkëlqyer të viteve ’80.
Ndërkohë, për finalen Francë – Brazil, e cila përfundoi 3-0 për gjelat, prej atëherë kanë ekzistuar teori konspirative për një “ndeshje të lënë”.
Megjithatë, Franca e atyre viteve, e përbërë nga treshja simbol Zidane – Deshamps – Lizarazu, ishte vërtet në superformë. /tesheshi.com/
