Pastori kanadez i cili ishte arrestuar nga autoritetet në Korenë e Veriut, doli përpara shtypit në Penian ku “rrëfeu” një komplot për të rrëzuar Qeverinë dhe për të vendosur një shtet fetar.
60-vjeçari Hyeon Soo Lim i cili drejton një kishë në Toronto, u ndalua në Korenë e Veriut në janar ndërsa kishte udhëtuar atje për punë humanitare.
Korea e Veriut nuk e ka të pazakontë ndalimin e të huajve, sidomos atyre të lidhur me aktivitet fetar që është i ndaluar në vend.
Agjencia shtetërore e lajmeve KCNA raportoi se pastori dha një konferencë shtypi në Penian ku pranoi se kishte përdorur punën humanitare si maskim për veprimtari armiqësore dhe me qëllimim “dashakeqës” për të ndërtuar një shtet fetar.
Ai pranoi, sipas agjencisë, se kishte predikuar se Koreja e Veriut duhet të rrëzohet me ndihmën e zotit dhe se kishte ndihmuar Shtetet e Bashkuara dhe Korenë e Jugut për të mbështetur dezertorët.
Raportimi i agjencisë nuk përmend masën e dënimit të pastorit.
Përgjatë 20 vjetëve, pastori kishte ndërmarrë misione humanitare në Korenë e Veriut, ku kishte shpërndarë ushqime e rroba dhe kishte ngritur një rrjet biznesesh për punësimin e njerëzve. /tesheshi.com/
