Nga Donat Maloku
“Hitlerin e kam idol”, thotë me plot gojën Emin Gjinovci nga fshati Makermali i Skënderajt, pa drojen që idoli i tij është ndër figurat me të errëta e më mizore të njerëzimit. E për këtë arsye, që prej vitit 1992, Gjinovci jeton me imazhin e një ndër njerëzve më të urryer në botë.
Por çfarë fshihet pas këtij lloj adhurimi për nga subjekti që adhurohet?! Pse Gjinovci pra është dashuruar kaq shumë pas atij mustaqemiu gjakpirës?! Mos është thjesht një i marrë?! Por jo! Përkundrazi. Ai përpiqet që zgjedhjes së tij t`i japë racionalitet, motiv, arsye, sens. Dhe për më tepër, të gjithë këto me sfond atdhedashës.
Ai thotë se motivi kryesor që e ka shtyrë të merr këtë pamje është fakti se Hitleri ka qenë armik i armiqve të tij, prandaj, në njëfarë mënyre, shndërrimi prej Eminit në Hitler ka qenë edhe si revoltë ndaj asaj që kanë bërë serbët ndaj popullit shqiptar.
“Edhe Hitleri ka luftuar kundër serbëve, kështu që e kam idhull. Armiku i armikut tim është miku im, po, armiq i kam serbët”, thotë Gjinovci.
Me këtë emër dhe imazh, ai është njohur edhe gjatë luftës së fundit në Kosovë. Si pjesëtar i ish-Ushtrisë Çlirimtare të Kosovës, “Hitleri” ka marrë tri plagë dhe tani është invalid i luftës.
Me gjithë pamjen e tij hitleriane, ai nga të gjithë njihet si një njeri shumë i afërt dhe modest.
Veçanërisht ai ka afërsi më fëmijët të cilët e përshëndesin kudo. Në anën tjetër, “Hitleri” i Kosovës, nuk e fsheh fare si ai është një ‘nazist’.
“Fëmijët i dua shumë, janë e ardhmja dhe bukuria e këtij vendi, po ashtu ata janë shumë të dashur ndaj meje”, ka thënë mitrovicasi me imazh të Hitlerit.
Ai ka pranuar se “në kartëvizitat e tij, ka shenjën e njohur naziste të kryqit të thyer”.
Të tjera të “Hitlerit” mitrovicar
Gjuhët e huaja janë karakteristikë Emin-“Hitlerit”. Ai flet gjermanishten, anglishten, rumanishten, sllovenishten etj. Ndërsa nuk preferon të flasë për politikën. Gati-gati, e urren atë.
“Më së paku që më pëlqen është të flas për politikën dhe politikanët, të cilët pa përjashtim janë duke vrapuar pas karrigeve pa çarë kokën për interesa madhore dhe popullin se si po jetojnë”, ka thënë ish-luftëtari i UÇK-së. Fjalë me mend pra, që nuk të japin hiç të kuptuar se ai nuk është në rregull nga mendt e kokës.
Ai flet më pasion dhe për jetën e tij private, ku rrëfen se ka gjashtë fëmijë.
Mandej fokusohet edhe në pasionet tij, ku cek dëshirën për filma aksion dhe për aktorët ‘amerikanë’ si Silvester Stallone apo Arnold Shvarceneger etj.
Ndërsa sa i përket muzikës, ai thotë se me ëndje dëgjon muzikë folklorike, apo “t’u pre e t’u gri”, siç thotë njeriu i shndërruar në një figurë kureshtare.
Ndodh shpesh, pohon ai, që njerëzit të ndalen, të më shikojnë me habi, ndonjëherë kur ndeshet me të huaj edhe më fotografojnë e kërkojë që të bëjmë foto bashkërisht.
Ai ka shtuar se për t`i larguar nga fotografimet e shumta që ata kërkojnë t`i bëjnë për kujtim, ju kërkon edhe para.
“Po jam lodh nga këtë të huajt që kërkojnë të fotografohemi për kujtim së bashku dhe për këtë ju kërkoj para, me qëllim që t`i largoj, por ka shumë raste kur ata kanë pranuar ofertën time”, thotë Gjinovci.
Ndërsa i përmend faktin se kohë më parë, mediat serbe kanë bërë një seri shkrimesh kundër tij, ai përgjigjet:
Sido që të jetë, Emini thotë se nuk e pengon aspak pamja që ka zgjedhur të identifikohet. Bile e bën që të ndihet mirë dhe krenar në lëkurën e një prej njerëzve më mizor të shekullit të kaluar, edhe pse ai në fakt është një njeri krejt tjetër. /tesheshi.com/
