Nga Blendi Gashi
Deputetja e PDK-së, Flora Brovina, në një intervistë ekskluzive dhënë për portalin tesheshi.com ka treguar në hollësi për alivanosjen e saj në Kuvend, pas gazit lotsjellës të hedhur nga opozita, për ndihmën e marrë në zyrën e kryetarit të Kuvendit dhe dërgimin e saj në ambulancë për trajtim të mëtejm.
Deputetja më e vjetër e Kosovës ka thënë se gazi lotsjellës edhe pse ka mundur t’ia merrte jetën, kjo gjë nuk i ka bërë aq përshtypje, por se nuk do ta harroj kurr një moment që ndodhi në ‘seancën e gazit’.
Brovina, në një prononcim të dhënë për tesheshi.com ka folur edhe për bllokadën e opozitës si dhe për rolin që duhet ta luaj Qeveria në gjetjen e një zgjidhjeje përfundimtare që Parlamenti t’i kthehet punës normale.
Rrëfimi i deputetes:
Siç e dini unë kam probleme shëndetësore. Kam të vendosura në zemër tre stenda, jam me tension të ultë dhe në situata me atmosferë të ndotur jam më e ndjeshme. Gazi lotsjellës më solli në një gjendje shumë të rëndë shëndetësore, por falë nitroglicerinës që e mbaj me vete jam gjallë.
Kam marr infuzion, terapi, dhe bërë analizat. Jam mirë por momentalisht pak e lodhur.
E kam përballu shumëherë gazin lotsjellës dhe kam intervenuar si mjeke në rastin e protestave që kanë ndodhur para luftës.
Po ju tregoi saktësisht si u alivanosa. Isha duke dalur nga salla dhe në anën që gjenden deputetët e Lidhjes Demokratike të Kosovës u ngultësova, mendova se po vdisja. Aty më ka kapur për setre deputeti Anton Quni, s’kam mundur me fol, e kam tërheq dhe më ka ndihmuar se e ka vërejtur se po rrëzohem. Më pas e kam parë vetën tek zyra e kryetarit të Parlamentit.
Nuk kam mundur të flas vetëm disi me gisht u kam treguar se në qantën time gjendet një shishe me nitroglicerinë. Mandej, personeli sjelli qumësht, qaj, sepse nuk ndihesha mirë.
Nga frika që mund të më ndodh më e keqja pranova që të shkoj edhe në spital të bëj analizat, bëra EKG-në, analizat e gjakut dhe mora infuzion.
Pastaj jam ardh në shtëpi dhe ende që nga ajo ditë vazhdoj të qëndroj gjysmë e ngritur, gjysmë e shtrirë. Megjithatë, jam mirë nuk dorëzohem kaq shpejt.
Ka mundur gjithkujt me i ndodh, por më vjen keq që më ka ndodh mua.
Brovina: Momenti që s’do ta harrojë kurrë
Dy gjëra nuk i kam të qarta. Para gazit lotsjellës, opozita na gjujati me ujë derisa ne ishim ulur në vendet tona pa bërë asgjë.
Deputetja Albulena Haxhiu me hidhte ujë, ky ishte një provokim për konflikt. Jo se unë nuk mundem ta zotëroj Albulenën, e di vetën që mundem, por besoni se nuk ishte momenti i këtij konflikti prandaj durova.
Ato pika uji që mi hidhte kolegja ime, të cilës dikush ia ka trasuar rrugën me ardh deri në Parlament, e ndoshta në mesin e tyre jam edhe unë, besoni se m’u kanë dukur më të rënda se çdo gjë.
Çdo dhunë që më ka shkaktuar armiku, kjo ishte e padurueshme sepse helmi vetëm mund të më vriste, por gjuajtja me ujë nga kolegia Haxhiu nuk harrohet kurrë.
Opozita po thotë se po e mbrojnë Kosovën nga marrëveshjet e Brukselit, por ata nuk po na dëgjojnë se çfarë kemi me thënë ne deputetët për marrëveshjet e fundit, a na pëlqejnë apo jo.
Ata e uzurpuan Kuvendin që me gjak e mund e kemi bërë.
Mos të harrojnë ata çfarë kanë bërë para një viti këto parti, e sjellën Zajednicën me udhëheq Kuvendin e më larguan mua, edhe pse me ligj e Kushtetutë më takonte mua ta udhëheq. Ata e sjellën kolegën nga Zajednica në krye të Kuvendit (Milka Vuletiç nga Lista Serbe, udhëheqi seancën kur Mustafa u zgjodh kryetar i Kuvendit në kohën e bllokut VLAN). Ata dëshiruan ta zgjedhin Isa Mustafën për kryetar të Parlamentit dhe jo unë, andaj nuk i kuptoj çfarë kanë. Këtë lëmsh e bën vet opozita duke mos i zbatuar ligjet dhe Kushtetutën e Kosovës.
Nëse ata kanë të drejtë ta mbrojnë Zajednicën, unë kam të drejt ta mbroj Parlamentin dhe këtë e kam dëshmuar.
Unë në Parlament jam për t’i balancuar situatat dhe për t’i bashkuar forcat. Jam për një opozitë të fortë dhe të logjikshme nuk jam kundër opozitës dhe vota ime është përshtat me idetë e tyre, por kjo ka qenë sepse unë kam autonominë time personale si deputete.
A do të marr pjesë në seancën e rradhës Brovina?
Në mbledhjen e ardhshme të Kuvendit nuk do të jem prezente jo për shkak të kokfortësisë sime, por do të udhëtoj në Zagreb ku do të kem takime shumë të rëndësishme të planifikuara më herët. Pra nuk do të jem nëse seanca mbahet ashtu siç është caktuar më 15 tetor.
Qeveria e ka fajin e vet për situatën e krijuar në Kuvend, sepse duhet të insistojë për dialog dhe duhet të ndërtohet strategjia e rrugëtimit më tej pozitë-opozitë. Kjo e fundit duhet të jetë çelësi kryesor i këtij rrugëtimi, të kundërshtojë kur nuk pajtohet por edhe të shfrytëzojë mekanzimat shtetërorë.
Nuk kemi kohë dhe nuk është e logjikshme që një popull i traumatizuar të traumatizohet edhe më tepër.
Edhe kur nuk na pëlqen diçka duhet gjetur rruga e përbashkët për të gjetur rrugëzgjidhje.
Deri më tani ka pasur gabime edhe nga vet kryeministri sepse ai duhej të ishte më fleksibil, por opozita ka treguar shumë jo mirësjellje.
Përfundon këtu rrëfimin e saj deputetja Brovina.
/tesheshi.com/
