Policia ka zbuluar identitetin e personave me kapuç e kallash, të cilët terrorizuan një lokal në Lezhë, duke u bërë kontroll të rinjve të atyshëm, klientë, por gjithsesi pa i lënduar. Pamjet bënë xhiron e mediave, duke shpalosur dhe njëherë anën e errët të realitetit të rëndit në vend, sidomos në zona si Lezha e Kurbini.
Por treshja e zbuluar, sipas Euronews Albania, nuk ndodhet në Shqipëri.
Ramazan Rraja, një emër i njohur tashmë, edhe si nip deputeti, Alesio Dobrozi dhe Rohan Brahimi, kanë fluturuar drejt Dubait, aty ku përgjithësisht po strehoen figurat e krimit, edhe për shkak të posedimit të shumave të parave që kanë fituar me aktivitete të paligjshme.
Ata janë shpallur në kërkim nga Policia, por këtë lajm e ndjekin nga Dubai i ëndrrave.
Ngjarja për të cilën kërkohen ndodhi më 13 nëntor në një fshat të Lezhës, ku në ambientet e një lokali mësynë disa persona të armatosur.
Nga hetimet e policisë ka rezultuar se për shkak të një konflikti të ndodhur më parë ndërmjet kushëririt të pronarit të lokalit dhe një shtetasi që është mik i personave të shpallur në kërkim, këta të fundit, kanë shkuar të armatosur në lokal dhe kanë kërkuar shtetasin me iniciale L. M.
Ky i fundit në momentet e ngjarjes nuk ka qenë në ambientet e lokalit. Hetimet e prokurorisë thonë se tre të rinjtë kanë dashur ta vrasin. Shkak i konfliktit kanë qenë pazaret e drogës. /tesheshi.com/
