Incidenti i ndodhur tek Varrezat e Dëshmorëve ku disa militantë të PD-së kanë rrahur disa veteranë që mbanin fotot e Enver Hoxhës është shoqëruar nga komente ekstreme dhe ndarëse.
Njerëz nga e majta kanë reaguar me egërsi duke e cilësuar aktin si “fashist”, kurse njerëz të së djathtës, madje edhe zëra të moderuar si Astrit Patozi e kanë jistufikuar “dajakun” duke ua vënë fajin veteranëve që sipas tyre kanë provokuar njerëzit e vuajtur nga diktatura komuniste.
Pas mbylljes së homazheve te Nëna Shqipëri, kur të gjithë ceremonitë kishin përfunduar, disa të moshuar marshuan me foto të Enver Hoxhës dhe disa figura të njohura të Luftës së Dytë Botërore.
Militantë të PD, anëtarë të FRPD të udhëhequr nga ish-deputeti dhe kreu i PD për një nga njësitë administrative të Tiranës, Ndriçim Babasi ju morën parullat e pankartat, fotografitë e Enver Hoxhës dhe filluan t’i dhunonin fizikisht.
Në një deklaratë publike, Lulzim Basha u tregua i prerë duke thënë se Partia Demokratike ishte e angazhuar për të çuar në Kuvend një pr/ligj për ndalimin dhe dënimin e ekspozimit në çdo formë të simboleve të regjimit komunist.
“PD është e angazhuar të çojë në parlament ligjin për heqjen e simboleve të komunizmit. Kurrë më nuk do pranojmë kthimin e së shkuarës, kjo do nisë me portretin e gjakatarit Enver Hoxha”,- tha Basha.
Ndërsa deputeti Erion Braçe, që është numri dy i grupit të PS-së, akuzoi Bashën se urren Luftën Nacional Çlirimtare dhe veteranët /tesheshi.com/
