Vuajtja nga humbja e turpshme ndaj Islandës është reflektuar qartë sot në fytyrën e Roy Hodgson-it, ndërsa ai ka dalë para gazetarëve në një konferencë shtypi.
“Nuk e di vërtet se çfarë po bëj këtu. Mendova se deklarata ime natën e shkuar ishte e mjaftueshme. Unë nuk jam më trajneri i Anglisë, koha ime ka mbaruar, por m’u tha se ishte e rëndësishme që të paraqitem këtu,” ka thënë i drobitur tekniku.
Duke iu kthyer ndeshjes së mbrëmshme, ai ka deklaruar se humbja me Islandën dhe largimi nga Europiani ka për t’i shkaktuar dëm afatgjatë ekipit.
“Emocionet e mia janë të dukshme. Jam vërtet i zhgënjyer. Nuk e pashë humbjen që po vinte. Asgjë në tre ndeshjet e para nuk më dha një shenjë që ne do të luanim aq keq.”
Humbja me Islandën është konsideruar si një prej më të këqijave nga shtypi sportiv anglez. Eliminimi i Anglisë qe krejtësisht i papritur, kur gjithkush priste që islandezët të kaloheshin pa problem.
“Jam ende i dobët,” ka vijuar Hodgson në konferencën e shtypit. “Nuk ishte një natë e mirë për askënd, sepse ne donim të qëndronim në këtë turne dhe të bënim paraqitje të mirë. Ne kthehemi në shtëpi si humbës dhe e ruajmë atë rekord të keq të humbjes në një turne në fazën me eliminim.”
Anglia fitoi vetëm një prej katër takimeve në Europian, për t’u eliminuar nga Islanda, por Hodgson tha se nuk kishte përgjigje magjike për ta shpjeguar paraqitjen e ekipit të tij.
“Kemi një urë të madhe për të riparuar. Të kishim luajtur më mirë natën e shkuar, ajo mund të mos kishte nevojë për riparim.”
68-vjeçari e dha dorëheqjen mbrëmë, menjëherë pas ndeshjes, por edhe nëse nuk do të kishte vepruar kështu, shkarkimi i tij ishte thjesht çështje kohe.
Hodgson shoqërohej në konferencën e shtypi nga shefi ekzekutiv i federatës angleze të futbollit, Martin Glenn, që bëri me dije se kishte nisur kërkimi për një trajner të ri. Ai nuk e përjashtoi mundësinë e zgjedhjes së një trajneri të huaj.
“Po kërkojmë për personin më të mirë, jo domosdoshmërisht për anglezin më të mirë.”
Spekulime të shumta ka për zëvendësuesin e Hodgson-it, por asnjë emër nuk është bindës deri tani. /tesheshi.com/
