Nico Rosberg u ka bërë një mbyllje fantastike provave zytare të garës së dymbëdhjetë sezonale në Formula 1, duke garantuar vendin e parë në nisje ditën e nesërme.
Piloti gjerman e mundi për herë të dytë në provat zyrtare në dy javë rivalin e tij për titull kampion, Lewis Hamilton-in, që u detyrua të kënaqet me një vend të dytë.
Dramatike qe xhiroja e Rosberg-ut, pasi ishte e vetmja në sesionin e tretë të provave pas një defekti elektrik që ia pamundësoi një xhiro më herët. Veç kësaj, makina e tij ishte më e rëndë për shkak të një sasie më të madhe karburanti.
Rosberg synon që nesër të rimarrë kreun në renditjen botërore, pasi piloton në shtëpinë e vet, në garën e Hockenheim-it.
Siç është bërë zakon tanimë, në vend të tretë e të katërt në këto prova u renditën dy pilotët e Red Bull-it, Ricciardo e Verstappen. Të ndjekur nga dyshja ferrariste, me Raikkonen-in në vend të pestë e Vettel-in në vend të gjashtë.
Dhjetëshen e parë e plotësuan Hulkenberg, Bottas, Perez e Massa. /tesheshi.com/
