Nico Rosberg është rikthyer të fitojë në Formula 1. Dhe e ka bërë këtë në mënyrën më të mirë të mundshme në garën e tetë sezonale.
Çmimi i Madh i Europës ka qenë këtë herë në një pistë debutuese, që gjarpëronte mes Bakusë, kryeqytetit modern të Azerbajxhanit.
Gjermani i Mercedes-it është nisur i pari në garën e sotshme, për të mos e lënë për asnjë çast kryesimin. Një pilotim pa asnjë të metë i ka dhënë Rosberg-ut fitoren e pestë sezonale, duke e rithelluar diferencën e pikëve me Hamilton-in.
Britaniku do të nisej i dhjeti pas asaj përplasjeje në provat e djeshme, e veç kësaj, do të përballej dhe me probleme mekanike të makinës. Vendi i pestë në finish ishte më i mundshmi sot për të.
Dy pilotët e Ferrari-t bënë një paraqitje të mirë. Vettel do ta përfundonte garën i dyti, falë dhe urdhrit të skuadrës që Raikkonen t’i hapte rrugën. Finlandezi u mjaftua me vendin e katërt.
Befasia qe Sergio Perez i Force India-s, që ashtu siç qe protagonist dje në provat zyrtare, po ashtu dhe këtë të dielë bëri një paraqitje mjaft të pëlqyeshme, duke u ngjitur në podium si fituesi i vendit të tretë.
Jo e mirë gara për Red Bull-in, që nuk e kishte shkëlqimin e javëve të shkuara. Ricciardo e Verstappen vuajtën goxha, për t’u renditur përkatësisht në vend të shtatë dhe të tetë.
Në dhjetë pilotët e parë do të zinin vend dhe Bottas e Massa të Williams-it, në vend të gjashtë dhe të dhjetë në mbarim të xhirove në Baku. Pati dhe një vend të nëntë për Nico Hulkenberg-un.
Nico Rosberg ka 141 pikë pas tetë garash, 24 më shumë se Lewis Hamilton-i i vendit të dytë, në renditjen e përgjithshme të pilotëve. /tesheshi.com/
