Shi, pistë e mbushur me ujë, prova të ndaluara tërësisht, makina të përplasura në rrethimet, dhe në fund një dalje jashtë kontrolli e makinës së Fernando Alonso-s, që e detyron Hamilton-in të frenojë, për ta bërë Rosberg-un të marrë vendin e parë.
Kanë pasur gjithçka provat zyrtare të garës së njëmbëdhjetë të Formula 1-shit. Për të përfunduar shumë më vonë se orari i tyre i zakonshëm për shkak të ndërprerjeve të njëpasnjëshme.
Në fund, fati ka qenë me Rosberg-un, që nesër do të niset i pari, duke qenë tejet i avantazhuar për ta fituar garën.
Hamilton është penalizuar për shkak të makinës së Alonso-s, të ndaluar thuajse në pistë, çka e ka shtrënguar britanikun të mos e përfundojë xhiron e tij të shpejtë.
“Isha pak pa fat me Fernando-n, por këto gjëra ndodhin. Nuk jam shumë i zhgënjyer; kemi një garë të gjatë përpara.” Kështu ka deklaruar pas provave Hamilton, që shpreson të fitojë sërish nesër.
Red Bull-ët konfirmohen si skuadra e dytë, me dy pilotët në vend të tretë e të katërt.
Raikkonen përfundoi çuditshëm në vend të 14-të, duke mos marrë pjesë fare në sesionin e tretë të provave, kurse Vettel u rendit i pesti.
I shkëlqyer Alonso sot, që shpeshherë dha kohët më të mira nga të gjithë pilotët. Dëshmi se në të ka ende gjak kampioni, veçse i duhet një makinë më e mirë.
Kjo është dhjetëshja e parë në startin e nesërm në garën e Hungarisë: Rosberg, Hamilton, Ricciardo, Verstappen, Vettel, Carlos Sainz, Alonso, Button, Hulkenberg dhe Bottas. /tesheshi.com/
