Ylli portugez i Real Madridit, Cristiano Ronaldo, është zgjedhur fitues i çmimit ‘UEFA – Lojtari i Vitit’, për herë të tretë në karrierën e tij.
Los Blancos sezonin e kaluar fitoi titullin e 12-të të Ligës së Kampionëve, një rekord ky, dhe Ronaldo ishte lojtari kryesor i skuadrës duke shënuar 12 gola dhe duke dhuruar 6 asist në 13 ndeshje.
Në konkurrencë për çmimin ‘UEFA – Lojtari i Vitit’ ishte edhe sulmuesi i Barcelonës, Lionel Messi dhe portieri i Juventus, Gianluigi Buffon.
Ronaldo e kishte fituar këtë çmim edhe në sezonet 2013/14 dhe 2015/16. Sulmuesi portugez u shpreh shumë i lumtur pasi mori trofeun duke falënderuar edhe njëherë klubin e tij Real Madridit.
“Çdo vit është i njëjti objektiv, të fitoj gjithçka. Jam shumë i lumtur të jem këtu dhe të fitoj këtë trofe sërish. Dua të falënderoj shokët e skuadrës te Real Madrid, si dhe shokët e ekipit në përfaqësuesen portugeze. E di që ky nuk është çmim që merret për fitoret me ekipin kombëtar, por dua t’i falënderoj pasi ata më motivojnë të punoj fort sa herë që bashkohemi. Jam shumë i lumtur. Faleminderit të gjithëve”, tha Ronaldo. /tesheshi.com/
