“Pas fitimit të Champions League-s, Euro 2016-s me Portugalinë, tani kjo kontratë e re… ka qenë një vit ëndrrash.”
Shprehësi i këtyre fjalëve është Cristiano Ronaldo, i cili sot ka nënshkruar një kontratë të re me klubin e famshëm madrilen, që do ta mbajë atë në kryeqytetin spanjoll gjer në vitin 2021.
Ky është rinovimi i dytë i portugezit që prej bashkimit të tij me Realin në vitin 2009. Një zgjatje kontrate pesëvjeçare u nënshkrua në 2013-n, e ndjekur nga një tjetër e ditës së sotme.
Kur kjo kontratë të marrë fund, Ronaldo do të jetë 36 vjeç, por ai deklaron se ka dhe dhjetë vite të tjera karrierë futbollistike përpara, e se kjo nuk është kontrata e tij e fundit me Realin e Madridit.
“Ajo çka dua më shumë është të vazhdoj t’i shijoj vitet që më kanë mbetur për të luajtur. Kam ende dhjetë vite. Sigurisht që do të doja ta përfundoja karrierën në këtë klub. Kjo është kontrata ime e parafundit; dua të jem këtu në vitet që do të vijnë,” ka thënë Ronaldo.
“Futbolli nuk ka kujtesë, por Reali i Madridit ka. Dua të vazhdoj ta rishkruaj historinë në këtë klub!” /tesheshi.com/
