Kapiteni i skuadrës portugeze të futbollit, Cristiano Ronaldo, doli para mediave në prag të ndeshjes kualifikuese me Sllovakinë, të planifikuar për të premten, më 8 shtator, në Bratislavë. Pas kësaj, portugezi mirëpret Luksemburgun.
Aty, pos për këto dy ndeshje, ai foli dhe për Messin, rivalin e tij argjentinas në distancë, fillimisht duke komentuar edhe numrin fantastik prej 850 golave që ka shënuar deri më tani në karrierën e tij të lartë.
“Është një pikë kthese. Ishte një surprizë për mua arritja e këtyre shifrave që nuk e mendoja se do t’i arrij. Por dua më shumë, ndërkohë që luan të paktën duhet të jesh gjithmonë lart”, ka theksuar kapiteni portugez.
Ronaldo ka luajtur për Al-Nassr që nga fillimi i këtij viti kalendarik dhe shumë yje të tjerë kanë mbërritur në Arabinë Saudite këtë verë. Si i sheh ai kritikat ndaj lojtarëve që i janë bashkuar klubeve saudite?
“Është normale. A ka një ligë që nuk kritikohet, që nuk ka probleme dhe polemika? Ndodh kudo, në Spanjë, Portugali etj. E dija, vazhdoj të them, të gjithë menduan se të shkosh në Arabinë Saudite ishte i çmendur, por i çmenduri nuk është aq i çmendur. Është tashmë normale të luash në këtë ligë.
Si lojtar i Al-Nassr, e dija që kjo do të ndodhte. Është privilegj të ndryshosh kulturën e një vendi dhe futbollin, të kesh yje të mëdhenj dhe kjo më bën krenar. Unë kam qenë pionier dhe jam krenar për këtë. Unë gjithmonë dua të zhvillohem më tej”.
Ndërsa të dy luanin në Evropë, ata ishin rivalë të mëdhenj. Ronaldo dhe Lionel Messi shënuan një epokë të tërë, dominuan zgjedhjet për Topin e Artë, çuan skuadrat drejt suksesit dhe trofeve me golat e tyre. Tani ata janë në anë të ndryshme të botës, Messi është në Inter Miami në SHBA dhe Ronaldo në Arabinë Saudite.
Gazetarët e pyetën Ronaldon nëse mendon se ata që e duan Messin e urrejnë dhe anasjelltas?
“Urrejtje? Nuk e shoh kështu, rivaliteti ka ikur. Ishte mirë, shikuesit e pëlqyen. Kush e do Cristiano Ronaldon, nuk ka pse ta urrejë Messin. Jemi të dy shumë të mirë, bëmë historinë e ne jemi të respektuar në të gjithë botën, kjo është gjëja më e rëndësishme.
Ai ka rrugën e tij, unë kam timen. Ai po ecën mire. trashëgimia vazhdon. Kemi ndarë skenën për 15 vjet dhe në fund kemi qenë, nuk po them miq, por kolegë profesionistë që e respektojmë njëri-tjetrin”, ka thënë Ronaldo. /tesheshi.com/
