Portugezi ka marrë çmimin si lojtari më i mirë i Champions League-s në sezonin e shkuar, i votuar nga lexuesit e dy gazetave sportive, Marca dhe Gazzetta dello Sport.
Pas marrjes së çmimit, Cristiano Ronaldo ka theksuar se dëshiron ta vijojë gjatë karrierën te Reali i Madridit.
“Kam fituar Champions League-n dhe Europianin. Eshtë një moment i bukur në karrierën time. Kjo më bën të punoj më fort për këtë klub. Eshtë ëndrra ime të vazhdoj të luaj për Realin e Madridit, dhe vërtet dua të qëndroj këtu për shumë vite, sepse klubi ka një vend të veçantë në zemrën time.”
Në intervistën e dhënë për Marca-n, e që do të botohet e plotë ditën e sotme, Ronaldo thotë: “Ky është klubi që unë dua.”
Sa për marrëdhëniet e tij me trajnerin aktual, Zinedine Zidane, ylli portugez nuk ka lënë të kuptohet se mes tyre ka një thyerje, siç është pretenduar më herët në shtyp. Në të kundërt, Ronaldo ka patur vetëm fjalë të mira për francezin.
“Ai e njeh mirë Realin e Madridit, çka është një plus, por ai gjithashtu dëgjon, çka është një avantazh i madh. Zidane është i qetë, shumë profesionist, dhe dëshiron të punojë.” /tesheshi.com/
