Portugezit Ronaldo i përfundon pas dy viteve kontrata me Realin e Madridit, por rreth tij nuk kanë të ndalur zërat për një largim më të shpejtë.
PSG-ja, skuadra kampione e Francës, duket se është e para në përpjekjet për ta afruar yllin botëror të futbollit.
Dhe zërat marrin konfirmim deri diku nga një takim i agjentit të portugezit Ronaldo, Jorge Mendes, me përfaqësues të klubit francez. Takim në të cilin pretendohet të jetë arritur një marrëveshje gojore mes palëve, sipas së cilës, PSG-ja do të ketë përparësi për të nënshkruar me lojtarin nëse ai vendos të largohet nga Reali i Madridit.
Ibrahimovic mendohet se do ta lërë PSG-në këtë verë, për ta vijuar diku tjetër karrierën, çka i bën drejtuesit e klubit francez të paduruar për të nënshkruar me një zëvendësues të denjë të tij.
Megjthatë, objektivi i PSG-së për të nënshkruar me Ronaldo-n mund të marrë një goditje të pariparueshme nëse presidenti i Realit i ofron portugezit një kontratë të re pesëvjeçare. Atëherë, në rast se Ronaldo do ta nënshkruante atë, shpresat për francezët do të shuheshin plotësisht. /tesheshi.com/
