Cristiano Ronaldo u përcaktua nga FIFA si lojtari më i mirë i 2016-s, një çmim që vjen pas “Topit të Artë”, të marrë prej tij javë më parë.
Portugezi 31-vjeçar fitoi vitin e lënë pas trofeun e Champions League-s me Realin e Madridit, një sukses të cilit iu shtua fitimi i Kampionatit Europian me bluzën e Portugalisë.
Në ceremoninë e zhvilluar në Cyrih, Ronaldo do të thoshte në marrjen e çmimit: “Ua kushtoj atë shokëve të skuadrës të Realit të Madridit, atyre të ekipit kombëtar, dhe trajnerëve të mi.”
“Jam në pikën më të mirë të karrierës sime. Ishte një vit madhështor, në nivelin individual dhe kolektiv, prandaj i jam mirënjohës çdokujt.”
“Nuk do ta harroj kurrë këtë vit të mrekullueshëm!”
Ronaldo do të grumbullonte 34.54 për qind të votave për çmimin, duke lënë pas argjentinasin Messi, me 26.42 për qind të votave, e francezin Griezmann, me 7.53 për qind të tyre. /tesheshi.com/
