Cristiano Ronaldo nuk po kalon kohë të paqta në Madrid. Golat e tij po pakësohen, ekipi nuk po paraqitet sic duhet, vitet kalendarike po i bëhen 33 dhe ai duhet të mendojë sistemimin për të ardhmen.
Për të marrë maksimumin portugezi i ka kërkuar klubit rritje page, edhe pse rinovimi i kontratës e mban atë të lidhur në Madrid deri në vitin 2021, e paga vjetore i shkon në 23 milion euro.
Por Ronaldo kërkon më shumë, e sipas mediave spanjolle, nëse nuk i plotësohet kjo “tekë”, ka kërcënuar se do të largohet. Klubi që do i hapte krahët nëse ai mendon ikjen nga Reali në verë, do të ishte Manchester United, që e lanccoi mes të mëdhenjve, por edhe që drejtohet nga Mourinho.
Pritet reagimi i klubit, i cili mbase ka plane të tjera për të ardhmen, pasi pretendon të veshë Neymar me fanellën e bardhë. Po kështu presidenti Florentino Perez ka deklaruar se do të marrë lojtarë të rinj në moshë, që të luajnë për shumë vite në Madrid. Harry Kane, Hazard, Mauro Icardi e të tjerë talente, zënë pjesën kryesore të preokupimit të Perez, i cili mbase nuk kërkon “dhimbje të tjera koke”, qofshin këto edhe të shkaktuara nga një yll si Ronaldo.
Megjithatë gjithçka do pritet të sqarohet, se klubi foli me kontratën e re me Ronaldon, e ndoshta mund të mos e kënaqë më tej “egon” e tij. /tesheshi.com/
