Cristiano Ronaldo rezultoi edhe një herë vendimtar për Realin e Madridit. Ndaj të parit ekip japonez në finalen e Kupës së Botës për klube, Kashima Antlers, portugezi shënoi një tregolësh në fitoren 4-2.
Në Jokohama nuk qe aspak e lehtë për fituesit e Champions League-s, edhe pse ata kaluan shpejt në epërsi me anë të Benzema-së. Japonezët befasuan kur barazuan e morën kryesimin në lojë pas dy golave të Shibasaki-t në fund të pjesës së parë e në fillim të së dytës.
Ronaldo do të barazonte shifrat në minutën e 60-të me anë të një 11-metërshi, për të shënuar dhe dy herë të tjera në shtesat nga 15 minuta.
Ky ishte trofeu i dytë i Botërorit të Klubeve i fituar nga Reali i Madridit; klubi madrilen nuk e njeh humbjen kësisoj në 37 takime të njëpasnjëshme në të gjitha aktivitetet.
Tregolëshi i Ronaldo-s erdhi vetëm pak ditë pasi ai fitoi Topin e Artë. Portugezi është gjithashtu i vetmi lojtar që e ka fituar Botërorin e Klubeve me dy ekipe të ndryshme, me Realin dhe me Mançester Junajtedin. /tesheshi.com/
