Reali i Madridit dhe Sevilja u përballën mbrëmë në finalen e Superkupës së Europës, një ndeshje që paralajmëron nisjen e sezonit të ri futbollistik në Europë.
Në stadiumin e vogël, por mjaft elegant, “Lerkendal”, në Trondheim të Norvegjisë, dy skuadrat spanjolle luajtën një futboll frymëzues.
Mungesat ishin të shumta në fushë, por asgjë nuk i pengoi lojtarët e të dy krahëve të luanin një finale tërheqëse.
Reali do ta niste pa treshen e zakonshme në sulm. Ronaldo e Bale janë mungesa që do të vijojnë dhe në javët e ardhshme, ndërsa Benzema do të hidhej në fushë në pjesën e dytë. Mbrëmja qe për të riun Marco Asensio, që, pas kthimit nga huazimi njëvjeçar, bëri një paraqitje të shkëlqyer, duke shënuar dhe një gol të mrekullueshëm në minutën e 21-të.
Vazquez do të barazonte për Seviljen në mbarim të pjesës së parë. Tre herë rresht fituese e Ligës së Europës, Sevilja dukej se do ta fitonte dhe Superkupën në përpjekjen e tretë, kur kryesonte gjer në fund të takimit me golin e shënuar nga pika e 11-metërshit prej Konoplyanka-s.
Eshtë Sergio Ramos ai që e ka rikthyer Realin në lojë në minutën e 93-të, pas një goli të shënuar me kokë. Ramos e ka bërë traditë tashmë shënimin e golave të tillë në çastet finale të takimeve.
Dy ekipet spanjolle shkuan në shtesë pas barazimit 2-2. Sevilja do të luante për gati 27 minuta me dhjetë lojtarë pas daljes me të kuqe të Kolodziejczak-ut. E tërhequr në gjysmëfushën e vet, Sevilja do të rezistonte gjer në minutën e 119-të, kur mbrojtësi Daniel Barvajal bën gjithçka mirë brenda zonës dhe shënon.
Reali i Madridit fiton 3-2 dhe ngre lart trofeun e Superkupës së Europës. /tesheshi.com/
