Cristiano Ronaldo ka ditur të tregohet një lojtar i madh atëherë kur duhet. Falë tij, Portugalia ka arritur për herë të dytë në një finale Europiani.
Njeriu i ndeshjes në gjysmëfinalen mes Portugalisë dhe Uellsit në Lion, Ronaldo është bërë lojtari i parë që ka luajtur në tre gjysmëfinale të kampionateve europiane, në vitet 2004, 2012 dhe 2016. Si lojtari që ka luajtur në 20 ndeshje europianesh, tre më tepër se çdo futbollist tjetër, ai ka barazuar dhe rekordin e francezit Platini, me nëntë gola të shënuar.
Në një ndeshje të parë si sfidë mes tij dhe shokut të skuadrës te Reali i Madridit, Gareth Bale-it, Ronaldo
do të shënonte golin e parë për Portugalinë, e po ashtu një goditje e tij do të devijohej për t’u kthyer po në gol.
Portugalia fitoi 2-0 ndaj Uellsit, duke shënuar emrin në finalen e Europianit, që do të luhet në ditën e fundit të kësaj jave, më 10 korrik. Pas një pjese të parë pa gola, ndryshimi i rezultatit do të vinte shpejt në 45 minutat e dyta. Një kërcim fenomenal i Ronaldo-s pesë minuta pas nisjes së kësaj pjese, dhe topi i gjuajtur me kokë prej tij do të përfundonte në rrjetën uellsiane. Nani do ta thellonte rezultatin tre minuta më pas.
Uellsi do të kishte rastet e veta në pjesën e parë, me protagonist Bale-in. Por pas dy golave të pësuar në fillimin e pjesës së dytë, uellsianët u treguan të dorëzuar, pa treguar më as dëshirën për ta kthyer rrjedhën e lojës.
Ndërsa për Portugalinë ishte takimi i parë i fituar në 90 minuta, për Uellsin ishte ndeshja e parë në këtë Europian që nuk ia doli të shënonte gol. Mungesa e Ramsey-it u duk të ishte kritike për Uellsin, teksa, duke filluar nga 2015-ta, skuadra nuk ka mundur të fitojë në katër takime ku ai nuk ka qenë i pranishëm.
Pavarësisht humbjes, arritja në gjysmëfinale ishte një sukses për Uellsin, e po ashtu për madrilenin Gareth Bale, që bëri një paraqitje mjaft të mirë në këtë Europian.
Portugalia e Ronaldo-s ka mundësinë më të mirë, ndërkohë, për të triumfuar në një turne të madh, pa marrë parasysh se kë ekip do të ketë përballë në finale, Francën apo Gjermaninë. /tesheshi.com/
