Ministria e Jashtme italiane po zhvillon negociata të nivelit të lartë me Turqinë pas bllokimit të anijes sondë të kompanisë Eni pranë ujrave të Qipros.
Siç bën të ditur agjencia italiane ANSA, Farnesina, (siç quhet MPJ-ja italiane) ka ftuar mediat e vendit të saj që të mos i fryjnë përplasjes Itali-Turqi.
Roma po ndikon pa zhurmë që të zgjidhë çështjen e kontratës që kompania shtetërore italiane Eni ka fituar nga qeveria e Qipros greke për të kërkuar gaz në detin e Mesdheut Lindor.
Dy ditë më parë, marina turke ndaloi sondën italiane duke bërë të ditur se nuk mund të kërkohet gaz natyror në ujrat në kufi me Turqinë pa një marrëveshje me Ankaranë.
Qeveria turke e konsideron vendimin e Qipros greke për të kërkuar gaz në mënyrë të njëanshme si “të papranueshme”.
Siç bën të ditur ANSA, ambasadori Italian në Turqi po zhvillon bisedime në Ministrinë e Jashtme të këtij vendi që të paktën sonda të hyjë në Qipro dhe të mos penalizohet sipas kontratës.
Nëse sonda nuk hyn në Qipro, do të gjobitet Eni; ndërsa nëse punimet nuk fillojnë për probleme diplomatike, atëherë faji i mbetet qeverisë qipriote siç është fakti real.
Roma i ka shprehur Ankarasë qëndrimin e saj se nuk dëshiron që të ndërmarrë hapa që prishin marrëdhëniet e mira mes dy vendeve.
Italia është një nga partnerët tregtarë më të mëdhenj të Turqisë në Bashkimin Europian. /tesheshi.com/
