Skuadra e drejtuar nga Luciano Spalleti ka regjistruar fitoren e katërt radhazi në kampionatin italian, ndërsa viktimë këtë herë ishte skuadra e Karpit. Verdhekuqtë morën një fitore me mjaft vlera në transfertë, për t’u rikthyer sërish në zonën që siguron pjesëmarrjen në Champions League.
Përkundër dominimit total të miqve nga kryeqyteti në takimin e mbrëmshëm, i dyti për këtë javë të Serisë A, rrjetat heshtën në pjesën e parë të lojës. Eshtë dashur të vijë minuta e 56-të që Roma të kalojë në epërsi.
Ishte Lucas Digne ai që me një goditje spektakolare shënoi një supergol. Vetëm pesë minuta më vonë, Kevin Lasagna barazoi për vendasit.
Por miqtë e morën atë për të cilin kishin udhëtuar në minutat e fundit të ndeshjes. Dzeko dhe Salah shënojnë njëri pas tjetrit në minutën e 84-t dhe të 85-të.
Me fitoren 1-3, Roma ngjitet në kuotën e 47 pikëve, e mban përkohësisht vendin e tretë në klasifikim. /tesheshi.com/
