Romanët rimorën vendin e dytë në Serinë A pas fitores 4-1 para pak minutash ndaj Torinos. Për herë të dytë në pak ditë, Roma shënon katër gola ndaj kundërshtarëve, të enjten ndaj Vilarealit në Ligën e Europës, e sot karshi skuadrës torineze.
Mihajlovic nuk parapëlqeu ta hidhte në fushë Arlind Ajetin, të lënë në stol pas dy ndeshjesh, por nuk ia doli ta shmangte humbjen.
Dzeko, Salah, Paredes dhe Nainggolan ishin shënuesit e golave për të zotët e shtëpisë, që si kundërpërgjigje patën vetëm një gol të Lopez-it gjashtë minuta para mbarimit të lojës.
Me 56 pikë, Roma është ndjekësja më e afërt e Juventusit të vendit të parë.
Këtë pasdite u luajtën dhe pesë ndeshje të tjera të javës së 25 të Serisë A. Peskara bëri çudinë me fitoren e saj 5-0 ndaj Xhenovës; e dyta fitore gjatë këtij kampionati për skuadrën që mbyll tabelën e klasifikimit.
Interi mposhti 0-1 Bolonjën në fushën e kësaj të fundit, Sampdoria dhe Kaljari u ndanë në barazim 1-1, Napoli u kthye nga transferta e Kievos me fitoren 1-3. Një tjetër trepikësh si udhëtuese siguroi dhe Sasuolo, që ndaj Udinezes pritëse fitoi 1-2.
Në orën 20:45 luhet takimi Milan – Fiorentina. /tesheshi.com/
