Në “Olimpico”, Roma fitoi 2-1 ndaj Interit, në të fundit takim të Serisë A për javën e shtatë. Epërsia për vendasit erdhi herët, që në minutën e pestë, kur shënoi Dzeko. Barazimit të Banega-s në pjesën e dytë iu përgjigj flakë për flakë Manolas, që edhe një herë tjetër i kaloi në avantazh vendasit.
Kjo qe humbja e dytë brenda një jave për Interin, që ditë më parë humbi dhe në Ligën e Europës. Një tjetër krizë për interistët, fitorja e të cilëve ndaj Juventusit dy javë më parë është mjegulluar shpejt.
Përndryshe, me fitoren 0-3 ndaj Empolit në transfertë, Juventusi vazhdon të mbajë kryesimin e kampionatit italian.
Torinezët janë katër pikë para Napolit të vendit të dytë, që humbi 1-0 ndaj Atalantës. Për fituesit ndër më të mirët ishte portieri Berisha, për humbësit spikati si rrallëherë me formën e dobët Hysaj.
Dy ekipet e kryeqytetit, Roma e Lacio, renditen në vend të tretë e të katërt. Lacialët, edhe pse me më pak pretendime se në sezonet e shkuara, por bëjnë paraqitje të mira. 0-3 fituan ata ndaj Udinezes. Strakosha në portë nuk pësoi gol për të dytën javë radhazi, duke fituar dhe besimin e ambientit lacial.
Me shumë gola ka qenë sfida Milanit dhe Sasuolos. Udhëtuesit e Sasuolos kanë udhëhequr 1-3 në “San Siro”, por milanistët kanë gjetur forca për ta kthyer rezultatin brenda tetë minutave në pjesën e dytë, duke fituar 4-3.
Torino u nda po ashtu me fitore në përballjen me Fiorentinën. Falque e Benassi ishin shënuesit për Torinon në fitoren 2-1.
Napoli, Roma e Lacio vijnë pas Juventusit në kryesimin e Serisë A, ndërsa tre vendet e fundit janë të zëna nga Palermo, Empoli dhe Krotone. /tesheshi.com/
