Çështja e Palestinës këto ditë është kryetema e të gjitha mediave dhe portaleve të mëdhenj apo të vegjël qofshin, ku Hamasi është emri më i lakuar juridikisht e politikisht. Në këto çaste terrori ku Palestina e tërë po vuan nga gjendja e luftës Gaza është territori më i goditur në botë prej një konflikti absurd ku e ka futur shteti izraelit vendin. Prej vitesh të gjitha organizmat më në zë botërorë e kanë dënuar ashpërsisht Izraelin dhe politikat e tij të aparteidit, ku ndër to dallon Amnesty International.
Në raportin e saj të shkurtit 2022, Amnesty International përcaktoi se si forcat izraelite kanë kryer në Gaza (si dhe në Bregun Perëndimor dhe Izrael) akte të ndaluara nga Statuti i Romës dhe Konventa e Aparteidit, si pjesë e një sulmi të gjerë dhe sistematik kundër popullsisë civile me synimin për të ruajtur një sistem shtypjeje dhe dominimi mbi palestinezët, duke përbërë kështu Krimin Kundër Njerëzimit të Aparteidit.
Pra kemi mbi 17 vjet që Izraeli e ka segreguar- izoluar rajonin palestinez të Gazës, saqë palestinezët aty e kanë detin dhe mezi arrijnë që me varkat e tyre të gjuajnë peshk për të ngrënë. E gjithë kjo popullsi është lënë në mëshirë të fatit dhe të ndihmave që ju vijnë nga territoret e pushtuara nga izraelitët. Nuk po llogarisim këtu poshtërimet që prej vitesh ju bëhen palestinezëve nëpër pikat e kontrollit nga ushtria izraelite.
Jeta e përditshme e këtyre njerëzve prej kohësh iu është kthyer në një ferr të vërtetë dhe këta njerëz nuk i janë nënshtruar këtij presioni për t’u larguar. Ata kanë prefereuar të rrijnë aty dhe ky është shembulli i një qëndrese heroike, që nuk ka penë ta përshkruajë. Nën këto terma duhet folur dhe nën këto terma duhet edhe të kuptojmë realitetin e përditshëm palestinez në Gaza, Bregun Perëndimor, në Kudsin Sherif e gjetkë.
Shifrat e të vrarëve civilë vazhdojnë të rriten dhe tragjikja është bërë pjesë e jetës së tyre, prandaj edhe ne sado gjykim të ftohtë të tregojmë si dhe mirëkuptim ndaj kësaj gjendje, nuk do të arrinim të jepnim një zgjidhje. Fuqitë e mëdha duhet të mblidhen dhe ta detyrojnë Izraelin të paktën sipas doktrinës së “two state solution”. Kjo është një zgjidhje që për momentin i kënaq të dyja palët dhe i hap rrugë pushimit të zjarrit, që ka përfshirë të gjithë Palestinën. /tesheshi.com/
