Shoqata e Futbollistëve Profesionistë ka zgjedhur t’ia japë çmimin e lojtarit më të mirë të sezonit aktual të Premier Ligës Riyad Mahrez-it. 25-vjeçari luan për ekipin e Lestër Sitit dhe për përfaqësuesen algjeriane.
I transferuar dy vite më parë nga kampionati francez i kategorisë së dytë, Mahrez ka qenë këtë sezon thelbësor për suksesin e skuadrës së tij, që kryeson Premier Ligën.
17 gola ka shënuar ai për Lestërin, përpos 11 pasimeve të tjera për gol, në 34 ndeshje të kampionatit. Harry Kane, Jamie Vardy, Dimitri Payet e Mesut Özil ishin disa prej rivalëve për çmimin, të lënë pas prej tij.
Mahrez ka falënderuar bashkëlojtarët te Lestëri, trajnerin e stafin, pa të cilët, sipas tij, nuk do ia kishte dalë ta fitonte çmimin.
“Nuk do ta kisha marrë këtë çmim pa shokët e mi të ekipit… E sa për trajnerin tim dhe stafin, pa ta nuk do ta siguroja këtë çmim dhe nuk do të shënoja. Eshtë fryma e ekipit, dhe dua t’ua kushtoj atë atyre.”
Mesfushori 20-vjeçar i Totenhemit, Dele Alli, u zgjodh si “Lojtari i Ri i Vitit” nga e njëjta shoqatë futbollistësh. /tesheshi.com/
