Banorët e telendisur ekonomikisht të Ballshit i janë gazuar këtë të premte rikthimit të rafinerisë së rifutur në punë, e që është dhe motivi bazë pse ekziston ky qytet. Kryeministri Edi Rama, i shoqëruar nga ministri i Energjitikës, Damian Gjiknuri ishin në kryeqendrën e Mallakastrës për t’u kumtuar ballshiotëve se tashmë ditë më të mira i presin.
“Rafineria gjeneron edhe avull në sasi të tilla që mund të furnizojë, sipas drejtuesve të saj, të gjitha serrat e Mallakastrës. Sasia është kolosale. Kjo është një vlerë të shtuar në mbështetje të bujqësisë për të gjithë zonën e Mallakastrës. Ne duhet ta synojmë këtë, të arrijmë sasinë e avullit që të furnizojmë gjithë serrat e Mallakastrës dhe t’i japim një bum gjithë zonës nga pikëpamja bujqësore”, tha Rama.
Pas rivënies në punë, uzina ka rinisur prodhimin e eurodieselit të standardit europian, benzinë super dhe derivate të tjera.
Rafineria e Ballshit, ose ndryshe Armo-ja, ishte një ndër aventurat e ish-biznesmenit të karburanteve, Rezart Taçi, i cili e la atë me borxhe të mëdha dhe të falimentuar, në disa afera të dyshimta me implikimin dhe të politikës. /teshesh.com/
