Kandidati për kreun e Lëvizjes Socialiste për Integrim Përparim Spahiu, platformën e tij për drejtimin e kësaj force poltike e ka mjaft ambicioze. Duke diskutuar me strukturat e Dibrës, të cilët i përfaqëson dhe në parlament, theksoi se e sheh LSI-në si potencial për të qënë forcë e parë politike.
“LSI e ka mbërritur tashmë pjekurinë e vet politike dhe i ka dhënë me të tepërt provat e veta, për të fituar një pozicion të ri, në politikën shqiptare, një rol të mirëfilltë udhëheqës në nivel kombëtar. LSI, nuk duhet të vazhdojë e të prodhojë kryeministra, që nuk janë me teserën e saj. Sepse shpesh kemi qenë të detyruar të paguajmë kosto shumë të larta si parti politike, kur aleatët, edhe hapur edhe nëpër korridore, na e kanë lënë ne, faturën e dështimeve te tyre. Edhe për vendime apo për zgjedhje politike, që as na kanë pyetur fare!”, theksoi ai.
Spahiu, thotë se qytetarët janë të lodhur nga hallet dhe problemet, ndërsa forcat politike janë të veshura vetëm me retorikë boshe. “Ndërsa LSI është një forcë politike e njeriut për njeriun, prandaj dhe ne shpesh e thërrasim njeri tjetrin në partinë tonë, “si je vlla?!”, apo “çfarë të bëj për ty vlla?!”, deklaroi ai.
Në platformën e tij si kandidat për të kryesuar LSI, Spahiu thotë se do të kërkojë që të hapet një diskutim në brendësi të partisë, mbi bilancin e qeverisjes 3-vjeçare me partinë Socialiste. /tesheshi.com/
