Edhe pse ka mbi një javë që është hedhur në tregun politik, nuk është komentuar ende një frazë e rëndësishme e Edi Ramës në Asamblenë e Partisë Socialiste ku shpalli qeverinë e re.
Edi Rama përveç emrave të rinj, që nuk ishin në fakt të tillë, shpalli projektin e ri politik për krijimin e një “force të re politike”, që në fakt përbën “rithemelimin e tretë” të së majtës shqiptare.
Pas 8 nëntorit 1941 me Partinë Komuniste dhe 10 qershorin 1991 me Partinë Socialiste, kjo përbën përpjekjen e tretë për të ngritur një forcë politike të qendrës së majtë që të përfaqësojë shoqërinë shqiptare që absorbon idenë daç quaje progresiste, daç konservatore, por që në thelb kanë përfaqësimin e një elektorati që për 100 vjet tw shtetit shqiptar kanë luftuar e votuar për një grupim të ndryshëm nga strukturat e mëdha pronësore që qeverisën apo u persekutuan në harkun e shekullit që shqiptarët i pa me shtet.
Për ta analizuar këtë fjalë të Edi Ramës, sot ka ardhur në ndihmë një material i shpërndarë me kujdes nga PS në lidhje me analizën që i është bërë zgjedhjeve të 25 qershorit nga “kuzhina strategjike” e kryeministrit shqiptar.
Dhe po ta analizosh këtë material bëhet fjalë për një “kataklizmo” të fortë që duket se do të përballet partia më e madhe e mazhorancës.
Materiali flet për rreth 43% të strukturave të PS-së që pritet të ndryshohen së shpejti, pasi kanë arritur rezultate të dobëta në zgjedhje.
Dhe këto struktura, që në gjuhën statutore të PS-së quhen organizata, do të përballen me një “tsunami” të vërtetë politik.
Sipas materialit, janë gjithsej 1480 organizata socialiste në të gjithë vendin që konsiderohen se kanë marrë rezultat të dobët në zgjedhje, krahasuar ky rezultat me zgjedhjet e vitit 2013.
Bazuar në statutin e Partisë Socialiste, nëse rezultati në zgjedhje është më i ulët se ai i zgjedhjeve të kaluara, kreu socialist largohet nga kandidimi. Që do të thotë që largohen rreth 1500 burra e gra, të cilët janë grupe reale interesi që ndikojnë në zgjedhjen e delegatëve në konferenca dhe kongrese, pra votues për të zgjedhur strukturat e larta të PS-së.
Bëhet fjalë për një operacion që Edi Rama do ta nisë së shpejti për të jetësuar atë që ai thotë “bashkëqeverisjen me shqiptarët”.
Që në fakt do të thotë një zgjerim të PS-së nga pjesët që kjo parti ka marrë vota, por që nuk janë të përfaqësuara në lobin vendosës së partisë.
Çfarë përfaqëson ky operacion?
Sipas asaj që Rama deklaroi në Asamble, pritet që ai ta zgjerojë bazën e PS-së me një pjesë të votuesve që për 25 vjet kanë qënë kontributorë, por kurrë përfitues të proçeseve politike brenda saj.
Rama, duket se kërkon të sjellë në partinë e tij jo thjeshtë votuesit e zhgënjyer të LSI-së apo të LIBRA-s së Blushit që mund të kthehen në shtëpi, por një grup që shkon nga qendra drejt së djathtës që e kanë përqafuar lutjen politike të Ramës për “timonin e bashkëqeverisjes”.
Për të siguruar një ambjent të sigurtë nga poshtë, duket se Rama do t´a ripërtërijë PS-në nga një kontigjent që ka qenë i përjashtuar nga kastat 25 vjeçare të PS-së, edhe pse kanë qenë votues të së majtës. Siç e tha edhe vetë në Asamble: “kësaj here nuk mban më ujë pilafi”, kryeministri synon të afrojë një gamë të madhe njerëz të paangazhuar që janë injoruar nga elitat politike por që më 25 qershor votuan për Ramën.
Një ekip i ngushtë i PS-së, ka hartuar një database të plotë se kush janë këta votues, që Rama synon t’i mbajë jo vetëm të karikuar por t’i ofrojë mundësi përfshirjeje.
Në qeverinë e re, Rama nuk hapi portat për të sjellë emra nga jashtë, siç duket që të mos shkaktonte ndonjë lëvizje tektonike nga lart PS-së, pra senatorët e vjetër, por më e rëndësishmja superstruktura e fuqishme e bazës, që është kthyer në një grup i vërtetë interesi.
Me zhvendosjen e Gramoz Ruçit në drejtimin e Kuvendit, Ramës i lirohet një vend i rëndësishëm në PS për të vënë dorë në strukturat socialiste, ku Ruçi i kontrollonte deri në detaj.
Po kush do të jenë këta njerëz të rinj që do të sjellë Rama? Cilës pjesë i përkasin?
Burime në kupolën rozë, bënë të ditur se bëhet fjalë për një fusion masiv që mund të vijë jo vetëm nga brenda vendit por edhe nga diaspora, e cila pritet që të jetë votuese në zgjedhjet e katër viteve të ardhshme.
Dhe një raport sekret i PS-së, bën të ditur se Rama gëzon një mbështetje të madhe jo vetëm në emigracionin e ri, por edhe gjeneratën e tretë të emigracionit të vjetër.
Pandeli Majko, si ministër i Diasporës, ka gjasa të kthehet si Gramoz Ruçi i ri brenda PS-së, ku të marrë në dorë përfshirjen e një fuqie të rëndësishme siç janë shqiptarët jashtë, të cilët në fund të fundit nuk kërkojnë vende pune, por një respektim apo të ndihen aktorë.
Dhe kjo pritet të bëhet shpejt si një aksion i fuqishëm politik qeveritar, i cili natyrisht që do të sjellë efekte edhe brenda PS-së.
Nëse do të ketë efekte, Rama, siç e tha në Asamble do të bëjë kooptimet përkatëse në qeveri, duke praktikuar një rotacion periodik. Por përpara se t´a bëjë në qeveri, ai natyrisht që do ta praktikojë brenda PS-së, ku së shpejti pritet të zgjidhen në funksione drejtuese njerëz të njohur të diasporës. /tesheshi.com/
