Vetëvrasja midis grave në të njëzetat e hershme është në nivelin më të lartë në dy dekada, tregojnë shifrat e ONS, pasi ekspertët paralajmërojnë për një krizë të shëndetit mendor midis grave të reja që luftojnë me presionet e jetës moderne dhe mediat sociale.
Ndërkohë që shifrat e përgjithshme për Britaninë e Madhe tregojnë se normat në periudhën 7-vjeçare janë të ulëta, femrat e moshës ndërmjet 20 dhe 24 vjeç kanë më shumë gjasa të vdesin nga vetëvrasja.
Vitin e kaluar, në këtë grupmoshë janë regjistruar 106 vdekje nga vetëvrasja, për herë të parë numri është më shumë se 100 që nga viti 1992, kur ishte 111.
Jenny Edwards nga CBE, shefe ekzekutive e Fondacionit të Shëndetit Mendor, i quajti shifrat “shqetësuese”.
“Ne e dimë se veçanërisht për femrat e reja niveli i tyre i shëndetit të dobët mendor është tre herë më i madh se ai i bashkëkohësve të tyre meshkuj”, tha ajo duke shtuar:
“Diçka po ndodh, përdorimi i mediave sociale është një arsye, por një tjetër arsye është marrëdhënia midis gjinive. Ata kanë më shumë pasiguri në jetën e tyre sesa që kanë pasur prindërit e tyre.
“Ka një tendencë për të fajësuar veten nëse gjërat nuk shkojnë si dëshirojmë ne. Veçanërisht kur marrim mesazhet nëpër mediat sociale se të gjithë të tjerët jetojnë jetë fantastike, kanë pushime të mira dhe punë të mira. Kjo është një përrallë që mund të ndikojë në shëndetin tonë të përgjithshëm mendor”.
Në vitet e fundit fushatat e parandalimit të vetëvrasjes janë fokusuar tek meshkujt, të cilët ende kanë një shkallë shumë më të lartë se gratë në të gjitha grupmoshat dhe kanë tre herë më shumë gjasa të vdesin nga vetëvrasja sesa gratë. Grupi më në rrezik janë meshkujt në fillim të 40-ve, ndër të cilët norma është 23.7.
Iniciativa të ndryshme janë përqendruar në inkurajimin e burrave për të folur në lidhje me ndjenjat e tyre me qëllim që të ulet shkalla e vetëvrasjes.
Organizatat bamirëse thanë se fushatat duket se po ndihmojnë, pasi shkalla e përgjithshme e njerëzve që vdesin nga vetëvrasja ka rënë për tre për qind nga 2015 në 2016.
Por ata shtuan se gratë mund të përballen me shumë probleme të së njejtën natyrë.
Elizabeth Scowcroft, drejtuese e hulumtimeve për samaritanët, tha: “Shumë çështje me të cilat ballafaqohen gratë janë të njëjta me burrat. Gratë mund ta kenë të vështirë të flasin për ndjenjat e tyre gjithashtu. Ne nuk duhet domosdoshmërisht të supozojmë se burrat dhe gratë kanë faktorë të rrezikut krejtësisht të ndryshëm.”
Profesor Louis Appleby, i Universitetit të Mançesterit, i cili udhëheq Strategjinë Kombëtare të Parandalimit të Vetëvrasjeve për Anglinë, tha se shifrat e përgjithshme ishin “më të mirat që kemi parë në vite”.
Në Angli norma e përgjithshme ra nga 10.1 në 9.5. “Duhet të ktheheni më shumë se tre dekada më parë, për të gjetur një rënie aq të madhe që ka ndodhur për vetëm një vit,” tha ai.
Megjithatë, ai tha se është e rëndësishme që të përcillen shifrat për të rinjtë.
“Ekziston një shqetësim që ne kemi një brez të të rinjve, të cilët reagojnë duke i shkaktuar dëmtim vetes ndaj streseve me të cilat përballen”, tha ai.
Vitin e kaluar një hetim mbi shëndetin mendor në Angli gjeti se më shumë se 1/4 gra të moshës 16-24 vjeç kishin ankth, depresion, çrregullim paniku, fobi ose çrregullim obsesiv kompulsiv dhe 1/5 thanë se kishin dëmtuar veten në një moment në jetë.
Ajo arriti në përfundimin se gratë e reja ishin “bërë një grup kyç me rrezik të lartë”.
Profesor Appleby tha se është “shumë e lehtë për të drejtuar gishtin kah mediat sociale”.
“Ka të mira dhe të këqija në shumicën e këtyre fenomeneve sociale,” tha ai, duke shtuar se shumë të rinj që luftuan me shëndetin e tyre mendor gjetën në internet një burim mbështetjeje dhe rehati.
Në një ekzaminim të viktimave të reja vetëvrasëse të kryera nga departamenti i tij, 1/4 nga rastet e mbuluara kishte përdorur internetin në një farë mënyre që kishte të bënte me vetëvrasjen, duke përfshirë publikimin e planeve të tyre në mediat sociale ose metodat e hulumtimit.
Përgatiti Jeton Zenuni – /tesheshi.com/
