Sekretari i Përgjithshëm i Partisë Demokratike, Arben Ristani deklaroi ditën e sotme se Bashkimi Europian, ka konfirmuar në raportin e publikuar dje, të vërtetën mbi drogën në vendin tonë.
“Shqipëria, për fat të keq, është në krye të listës së prodhimit të hashashit dhe të tregtimit të tij të paligjshëm. Ky raport i Bashkimit Europian është konfirmimi se kanabizimi masiv i vendit, përmes grupeve kriminale të lidhura me policinë, me Saimir Tahirin dhe Edi Ramën, është realiteti i hidhur që po jetojmë”, – tha Ristani.
Sipas tij, lordët e hashashit kanë gjetur parajsën në Shqipëri, pasi ata erdhën në pushtet me Edi Ramën, ndajnë pushtetin me të, dhe do tentojnë të mbajnë pushtetin duke blerë votën e shqiptarëve të pamundur, sa herë ti thërrasë kumbari.
“Bashkimi Europian me këtë raport të rëndë për vendin dhe imazhin e Shqipërisë, thjesht ka pohuar pasojat e inkriminimit masiv, pasojat e bashkëqeverisjes me krimin e trafikun. Raporti i Bashkimit Europian është një thirrje për qytetarët që të bashkohen, të ngrihen e të ndalin, një orë e më pare, oligarkinë e krimit dhe hashashit”, – përfundoi Arben Ristani. /tesheshi.com/
