Debatet e shumta që kanë përfshirë politikën dhe shoqërinë shqiptare pas daljes së raportit që tregon se ka ulje të të ardhurave në buxhetin e shtetit dhe se Qeveria planifkon rishikim të buxhetit, kanë alarmuar zyrtarët. Këta të fundit përmes një deklarate kanë sqaruar se vendimi ka kosto minimale në buxhetin e institucioneve buxhetore.
“Edhe pse shpenzimet buxhetore propozohen me ulje, ajo çfarë është më e rëndësishme lidhet me faktin se buxheti real i institucioneve nuk preket, por ndërhyrja është bërë në ato zëra, ku janë evidentuar kursime, ose ku shpenzimet, ashtu siç janë parashikuar, do të rezultonin me mosrealizime në fund të vitit”, thotë ministria e Financave.
Shpenzimet kapitale në aktin normativ të Qeverisë mbeten pothuajse në të njëjtat nivele, gjë që sipas Financave, tregon se ekonomia është e sigurt në marrjen e stimujve nga buxheti i vitit 2015.
Buxheti parashikon edhe alokime për shkak të ecurisë së ngadaltë të zbatimit të projekteve me financime të huaja, kryesisht në sektorin e rrugëve nacionale.
Sipas ministrisë së Financave, investimet me financim të brendshëm për ministritë e linjës dhe institucionet buxhetore rriten me rreth 5 miliardë lekë, shumë që rritet edhe me financime për projekte si ndërtimi i stadiumit të ri “Loro Boriçi”, Shkodër me 1.5 miliardë lekë, fondi për zhvillimin e rajoneve me 500 milionë lekë. /tesheshi.com/
