Më 55 vota “për” dhe 23 “kundër” në seancën e 111 të Kuvendit është votuar rishikimi i buxhetit në Maqedoni. Deputetët e opozitës nuk kanë votuar për buxhetin.
Rishikimi i Buxhetit parasheh ulje të të ardhurave të përgjithshme prej 177,292 milionë denarë në 174, 291 milionë dhe të shpenzimeve të përgjithshme prej 196,276 në 195,472 milionë. Lidhur me rishikimin e buxhetit ka pasur debate të shumta, e sidomos akuza të rënda të opozitës shqiptare në drejtim të partisë shqiptare në pushtet BDI-së, ngase me rishikimin e buxhetit kanë pësuar shumë projekte me rëndësi për popullatën shqiptare.
Për Sheshin Skënderbeu në Shkup janë shkurtuar 13.47 për qind e mjeteve ose 26 milion denarë.
Për Teatrin dhe Bibliotekën e Tetovës, janë shkurtuar 60 milion denarë, ose 33 për qind nga vlera e caktuar me Buxhetin e vitit 2016.
USHT-së i janë shkurtuar 22 milion denarë, ose 2,87 për qind nga buxheti i përgjithshëm. 17 milion denarë do t’i merren edhe Klinikës së Tetovës dhe Spitalit të Kërçovës.
Me votimin për rishikimin e buxhetit Drejtoria për trashëgimi kulturore dhe shpirtërore të shqiptarëve në Maqedoni nuk ekziston si pozicion buxhetor.
Vlen të ceket se me rishikimin e buxhetit është goditur rëndë edhe Zona Industriale e Vizbegut ngase nga 10 milion denarët e parashikuar në buxhet janë shkurtuar në 100 për qind të gjitha mjetet.
Në rishikimin e buxhetit janë parashikuar edhe 450 milion euro e siguruara nga lëshimi i euro-bondit ditë më parë nga ana e Qeverisë. /tesheshi.com/
