Rishi Sunak, 42 vjeç, me origjinë nga India dhe një hindu i devotshëm, për herë të parë doli në qendër të vëmendjes në Britani kur, në moshën 39-vjeçare, u bë Kancelar i Thesarit nën Boris Johnson. Ai tashmë është kryeministri i ri i Britanisë, pasi Penny Mordant nuk arriti të mblidhte 100 nënshkrime parlamentare dhe u tërhoq nga gara.
Sunak, i cili u zgjodh për herë të parë si deputet në vitin 2015, u dallua menjëherë në politikë. Kur pandemia goditi Britaninë, ai krijoi një program pezullimi pune për të mbështetur miliona britanikë. Ndonëse ishte i preferuari që në fillim, për rolin e kryeministrit, iu desh të përballej dy herë me rivalët e brendshëm partiakë për të arritur në majë të qeverisjes. Herën e parë, Liz Truss ia bllokoi rrugën drejt pushtetit, duke e vonuar atë me vetëm 44 ditë.
Sot, kryeministri i ri i Britanisë është lideri i parë me origjinë indiane dhe një ish-bankier multi-milioner i Goldman Sachs që po përballet me një nga krizat më të këqija financiare të vendit. Britania po zhytet në recesion për shkak të kostove gjithnjë në rritje të energjisë, normave të larta të interesit të banesave, rritjes së çmimeve të ushqimeve dhe efekteve negative të Brexit.
Ai gjithashtu duhet të përballet me një luftë të brendshme civile brenda partisë së tij, konservatorët, si dhe me rritjen e shpejtë të laburistëve në sondazhe.
Nga India në Southampton
Rishi Sunak, 42 vjeç, lindi në Southampton, Anglinë jugore, nga prindër me origjinë indiane, të cilët kishin emigruar në Britani nga Afrika Lindore. Familja e tij emigroi në Britani në vitet 1960, një kohë kur shumë njerëz nga ish-kolonitë e Britanisë mbërritën në vend për të ndihmuar në rindërtimin e saj pas Luftës së Dytë Botërore.
Ai ndoqi shkollën elitare të konviktit Winchester College dhe më pas me një bursë në Oksford, ku studioi Filozofi, Politikë dhe Ekonomi. Pas diplomimit në Universitetin e Oksfordit, ai vazhdoi në Universitetin e Stanfordit. Atje ai takoi gruan e tij Aksatha Murthy, babai i së cilës është miliarderi indian Narayana Murthy, themelues i gjigantit Infosys Ltd. Madje shumë pretendojnë se Aksata ka më shumë pasuri se mbretëresha Elizabeth.
Sunak konsiderohet si mishërimi i Britanisë multietnike. I përket krahut modern të Partisë Konservatore. Ngritja e tij ka qenë shpërthyese që nga zgjedhja e tij e parë në Parlament në 2015.
Sunak, vetëm 42 vjeç, ishte një anëtar i Brexit-it që u bë ministër i financave, i dyti në hierarkinë e qeverisë, menjëherë pas kryeministrit Boris Johnson, i cili sot është 58 vjeç. Të dy u përpoqën para verës të shpallin një plan të ri ekonomik, por nuk arritën të bien dakord. Sunak e ka konsideruar prej kohësh pozicionin e tij mbi politikën ekonomike si “thelbësisht të ndryshëm” nga ai i Johnson.
Kritikët e tij thonë se ai e tradhtoi Boris Johnson, i cili e kishte emëruar atë, kur ai dha dorëheqjen si Kancelar i Thesarit në fillim të korrikut. Megjithatë, ishte lëvizja e tij që çoi në shpërbërjen e kabinetit dhe më pas në rënien e Johnson disa ditë më vonë.
Ky është Sunak, kjo është politika! /tesheshi.com/
