Eshtë rishfaqur Saimir Tahiri, me deklarimet e tij të njohura tashmë për pafajshmëri në një gjyq që pritet të japë verdiktin mbi fati e tij, pas akuzave për implikime në afera droge, në kohën kur drejtonte Rendin si ministër nën qeverinë “Rama 1”.
Komentetet e tij u bënë pas një seance maratonë prej 6 orësh në Apel, pas së cilës tha se vendimin që do të jepet me 24 qershor.
“Vendimin do ta pranoj pa asnjë diskutim, sa të drejtë, të shoh vendimin dhe do ta flas. Unë di raportin tim me të drejtën dhe kjo nuk kalon as nga prokuroria dhe as nga gjykata. Çmimi i jetës sime nuk kalon nga çmimi i karrierës së tyre (nënkupto: prokurorëve dhe gjyqtarëve)“,tha ai.
Tahiri kujtoi dhe njëherë standartin e vendosur prej tij me vetëdorëzim mandati, e njëherësh vetëshpalli pastërtinë e tij nga çdo akuzë.
“Jam i vetmi që lash mandatin për t’u përballuar si qytetar i thjeshtë me drejtësinë. Besoj te drejtësia, por nuk ka rëndësi për mua nëse do të vijë drejtësia nga gjykata apo është drejtësia që besoj unë.
Para të gjithëve jam super i bindur që kam bërë në çdo hap të punës sime gjënë e duhur…e kam bërë më mirë se ata që ishin dhe ata që janë“, tha ish-kreu i Rendit. /tesheshi.com/
