Doris Pack është një politikane gjermane që ka 25 vjet që drejton në Bruksel Komisionin e psaçëm për Shqipërinë. Ajo i përket CDU-së së Merkelit, por ka që prej tre vjetësh që nuk është më eurodeputete.
Megjithatë ajo ka ardhur në Tiranë në një aktivitet të PD-së, posaçërisht grave të PD-së dhe ka folur në një farë mënyrë kritikisht kundër ambasadores së BE-së, Romana Vllahutin, ndërkohë që Brukseli zyrtar i ka cilësuar këto akuza si të ulëta.
E pyetur për akuzat ndaj diplomates kroate, zonja Pack tha:
“Për të qënë e sinqertë, do ndihesha me të vërtetë e turpëruar nëse ato që thuhen për ambasadoren e BE-së në Tiranë do ishte e vërtetë. Nuk e di, por ajo që kam dëgjuar më ka inatosur shumë. Nëse është e vërtetë, është një turp i madh për Bashkimin Europian sepse ne ju kërkojmë juve të luftoni korrupsionin dhe krimin dhe nëse dikush prej nesh është me të vërtetë i përfshirë në diçka të tillë, atëhere për ne është një turp i madh”.
Zonja Pack vërtetë që nuk është zyrtare por ka një përvojë të gjatë dhe ka qenë e lidhur me Shqipërinë, e posaçërisht me PD-në. /tesheshi.com/
