Partia Demokratike duket se do të hyjë në një fazë të re të organizimit të saj pas humbjes së thellë në zgjedhjet parlamentare të 25 Qershorit, ku morri vetëm 43 mandate deputetësh.
Rreth 10 ditë më parë demokratët përmes parimit “një anëtar, një votë”, rikonfirmua me mbi 90% të votave Lulzim Bashën për postin e Kryetarit të PD-së, ndërsa duket se çdo lëvizje tjetër në selinë blu do të ndërmerret në Shtator.
Nisja e punimeve të Kuvendit pritet të zbardhë edhe dy postet më të rëndësishme në selinë e PD-së pas atij të Kryetarit, kjo pasi statuti i partisë më të madhe të opozitës, parashikon që Kryetari i Grupit Parlamentar dhe Nënkryetari i Kuvendit, automatikisht janë edhe Nënkryetarët e PD-së.
Tesheshi.com ka mësuar se për të dy postet ka një seri kandidaturash, përveç dy Nënkryetarëve aktualë, Edi Paloka dhe Edmond Spaho.
Burimet shprehen se në garën për kreun e Grupit Parlamentar përfliten emrat e Genc Pollos, Grida Dumës, Oriola Pampurit, e cila renditej e dyta në listën e kandidatëve të PD për Qarkun e Tiranës. Ndërkohë për postin e Nënkryetarit të Kuvendit, veç kandidaturës së Edmond Spahos, në garë duket se janë edhe Tritan Shehu, Aldo Bumçi, Valentina Duka.
Por gjithashtu partia më e madhe e opozitës duket se është përfshirë nga ethet edhe përsa i takon posteve të Sekretariatit, ku më i rëndësishmi është ai i Sekretarit të Përgjithshëm.
Burimet shprehen se është menduar që numri dy i partisë të mos jetë nga rradhët e deputetëve, me synimin që agjenda parlamentare të mos pengojë proçesin e organizimit të PD në bazë, i cili duket se do të hyjë në një reformim të thellë. Megjithatë në selinë blu përfliten disa emra për postin e Sekretarit të Përgjithshëm mes të cilëve edhe Gent Strazimiri, Ervin Salianji, Halim Kosova apo kandidati për kreun e PD-së, Eduart Selami, i cili ka aspiruar këtë post edhe 4 vite më parë në garën mes Arben Ristanit dhe Enkelejd Alibeaj. Po kështu për postin e Sekretarit Organizativ ka disa kandidatura, edhe pse sërisht mësohet se ky pozicion do të synohet të ndahet nga ai i deputetit.
Tesheshi.com ka mësuar se fundi i muajit gusht apo fillimi i shtatorit do të zbardhë disa nga kandidaturat zyrtare për postet më të rëndësishme në PD, edhe pse gjatë ditëve të fundit kanë nisur artikulimet e emrave të parë që synojnë postet në këtë parti. /tesheshi.com/
