Ish-numri një i botës, spanjolli Rafael Nadal, është kthyer edhe një herë të triumfojë pas një periudhe të gjatë të mbizotëruar nga dëmtimet.
Ai dhe spanjolli tjetër, Marc Lopez, kanë marrë medaljen e artë në ndeshjet në çift në Lojërat Olimpike të Rio de Zhanejros.
Dy spanjollët fituan 2-1 në finalen e meshkujve në çift ndaj rumunëve Florin Mergea dhe Horia Tecau. Nadal e Lopez do ta fitonin setin e parë 6-2, për ta humbur të dytin 3-6. Seti final do të shkonte në favor të tyre, duke u fiksuar në shifrat 6-4.
Edhe pse me pak përvojë në lojën së bashku, Nadal e çmoi Lopez-in si një prej miqve të tij më të mirë. “Eshtë privilegj të jem në gjendje ta ndaj këtë moment me një prej miqve të mi më të mirë.”
Nadal ka përparuar në këto lojëra dhe në tenisin tradicional, vetjak, duke kaluar në gjysmëfinale, ku do të ndeshet me argjentinasin Juan Martin del Potro.
Nëse do të ketë sukses në gjysmëfinale, Nadal mund të ndeshet në finale me Andy Murray-n apo Kei Nishikori-n, dy gjysmëfinalistët e tjerë.
Spanjolli e ka fituar në 2008-tën, në Lojërat Olimpike të Pekinit, medaljen e artë në tenis në lojën teke. /tesheshi.com/
