Rekordmeni i medaljeve olimpike, notari Michael Phelps, ka shkëlqyer sërish, duke fituar në dy gara në Lojërat Olimpike të Rio de Zhanejros.
Së pari ai ka garuar në 200 metra në stilin flutur, ku qëllimi i tij i vetëm ka qenë hakmarrja ndaj afrikanojugorit Chad le Clos, që e pati mundur katër vite më parë në Londër.
31-vjeçari do ta fitonte këtë garë, e cila do t’i sillte medaljen e 20-të të artë të fituar në olimpiada. Fitimi i 200 metrave në stilin flutur ka qenë objektivi i tij parësor që kur iu rikthye përsëri garave dy vite më parë.
“Erdha në pishinë sonte me një mision, dhe misioni u krye.”
Afrikanoveriori do ta përfundonte garën i katërti, kurse medalja e argjendtë shkoi për japonezin Masato Sakai, e ajo e bronzta për hungarezin Tamas Kenderesi.
Më pas do të vinte stafeta 4×200 metra në stil të lirë, ku Phelps e ndihmoi ekipin amerikan të zinte vendin e parë, duke i siguruar vetes dhe një tjetër medalje të artë, e 21-ta për të.
Phelps është sportisti me më shumë medalje të fituara në Lojërat Olimpike, ndërsa ka fituar dy herë më shumë medalje të arta se ish-gjimnastja sovjetike Larisa Latynina, e dyta në listë. /tesheshi.com/
