Olimpistja amerikane nga Nju Xhersi, Ibtihaj Muhammad, ka avancuar më tutje të hënën në Lojërat Olimpike në garat e skermës, duke fituar 15-13 ndaj ukrainases Olena Kravatska.
Ky ishte debutimi i saj në Lojërat Olimpike, të nisur suksesshëm me një fitore dramatike ndaj ukrainases.
Veçse gëzimi nuk do të zgjaste shumë, pasi në të njëjtën ditë ajo do të eliminohej një raund më tej nga francezja Cecilia Berder. Përfaqësuesja në skermë e Francës do të fitonte 15-12 ndaj amerikanes.
Ibtihaj Muhammad do të hynte në histori të hënën, pasi u bë sportisja e parë amerikane që garon me hixhab në Lojërat Olimpike.
Medalja e bronzit e fituar më herët gjatë këtij viti në Kupën e Botës të Skermës, të zhvilluar në Athinë, i dha mundësi asaj që të bëhej pjesë e ekipit olimpik amerikan.
Portreti i saj do të ndeshej shpesh në media që prej asaj kohe, pikërisht për shkak të hixhabit. /tesheshi.com/
