Brazili më më fund e ka marrë medaljen e artë olimpike në futboll për meshkuj. Një përpjekje e çuar dëm në tre raste të mëhershme, me finalen të humbur më 1984, 1988 dhe 2012.
Brazili më në fund ka marrë hak ndaj Gjermanisë pas asaj humbjeje të turpshme në gjysmëfinalen e Botërorit të 2014-tës.
Neymar më në fund është bërë protagonisti absolut i përfaqësueses braziliane, me një meritë të posaçme në fitimin e medaljes së artë.
Përfaqësuesja e Brazilit do t’i niste keq ndeshjet e saj në këto Lojëra Olimpike. Dy barazime pa gola ndaj Afrikës së Jugut dhe Irakut u shoqëruan me një valë të jashtëzakonshme kritikash. Por autokritika nuk do të vononte: 4-0 ndaj Danimarkës, 2-0 ndaj Kolumbisë, 6-0 ndaj Hondurasit, dhe finalja e fituar.
Brazili dhe Gjermania u përballën në finalen olimpike në “Maracana”, në një prej stadiumeve më me emër në botë. Neymar do ta kalonte Brazilin në avantazh në minutën e 27-të, pas një ekzekutimi të përsosur të një goditjeje dënimi. Por brazilianët do të ishin me fat që do ta ruanin fitoren në pjesën e parë, pas një serie rastesh të gjemanëve. Që sidoqoftë e gjejnë golin e barazimit në minutën e 59-të, kur shënon Meyer.
Bashkë me shtesat 15-minutëshe, asgjë nuk do ta ndryshonte rezultatin 1-1. Lojtarët e të dy ekipeve do të
shkonin para pikës së 11-metërshit. Ishte hera e dytë në olimpiada që fituesi i medaljes së artë do të përcaktohej nga penalltitë.
Për Brazilin shënojnë Renayo Augusto, Marquinhos, Rafinha dhe Luan. Gjermanët përgjigjen me katër ekzekutimet e sakta nga Ginter, Gnabry, Brandt dhe Süle.
Në të pestin 11-metërsh, Petersen gabon për Gjermaninë, dhe Neymar nuk fal për të zotët e shtëpisë. E kthen në gol penalltinë e tij dhe i dhuron medaljen e artë Brazilit.
Neymar do të thoshte pas finales: “Kjo është një nga gjërat më të mira që ka ndodhur në jetën time. Kaq!”
Nigeria fitoi 3-2 ndaj Hondurasit, duke marrë medaljen e bronztë, që ishte dhe e para medalje për tërë ekipin olimpik nigerian në këtë olimpiadë. /tesheshi.com/
