Vendi organizator i Lojërave Olimpike nuk e ka fituar asnjëherë medaljen e artë olimpike në futboll, por këtë herë duket se po i afrohet dalëngadalë asaj.
Pas një nisje mjaft të keqe, Brazili e ka marrë veten, ka kaluar grupin, e, më tej, ka mposhtur në çerekfinale Kolumbinë.
Për brazilianët do të shënonin Neymar e Luan në fitoren 2-0 në të gdhirë të së dielës. Kundërshtari i tyre në gjysmëfinalen e së mërkurës është Hondurasi, që e eliminoi Korenë e Jugut pas ndeshjes të përfunduar 1-0.
Rezultati më i thellë i çerekfinaleve ishte fitorja 4-0 e Gjermanisë ndaj Portugalisë. Gjermanët do të luajnë në gjysmëfinale ndaj nigerianëve.
Nigeria pati për kundërshtar Danimarkën në çerekfinale, të cilën e mundi 2-0.
Kujtojmë se përfaqësueset olimpike përbëhen nga lojtarë nën 23 vjeç, ndërsa lejohet që me to të grumbullohen dhe tre të tjerë mbi këtë moshë.
Dy gjysmëfinalet në Lojërat Olimpike të Rios do të luhen të mërkurën. /tesheshi.com/
