Ushtruesi i detyrës së Kryeministrit të Kosovës Albin Kurti foli të premten pasdite me Përfaqësuesin Special të Bashkimit Evropian për Dialogun ndërmjet Kosovës dhe Serbisë dhe çështje të tjera rajonale në Ballkanin Perëndimor, Mirosllav Lajçak.
Kurti e informoi Lajçakun për situatën me Covid-19 në Kosovë, si dhe për masat e marra nga Ministria e Shëndetësisë, të cilat respektohen maksimalisht nga qytetarët e Kosovës, tha qeveria e Kosovës.
Në lidhje me dialogun mes Kosovës dhe Serbisë, Lajçak e informoi Kurtin se aktualisht është duke analizuar marrëveshjet e arritura deri më tani ndërmjet Kosovës dhe Serbisë, si dhe po zhvillon bisedime me palët që do të përfshihen në këtë proces.
Kurti tha se “qeveria e Kosovës aktualisht është duke u përqëndruar në luftën kundër Covid-19, e cila duhet të bashkohet nga të gjitha partitë politike nga qeveria dhe opozita në Kosovë.”
Kurti gjithashtu i kërkoi Lajçakut të bindte palën serbe që të braktiste idenë e shkëmbimit të territoreve ndërmjet Kosovës dhe Serbisë.
Të dy bashkëbiseduesit ranë dakord se ata do të jenë në kontakt të vazhdueshëm dhe sa më shpejt që situata me virusin Covid-19 të tejkalohet, do të fillohet dialogu mes Kosovës dhe Serbisë.
Shefja i Zyrës së BE në Prishtinë, Nataliya Apostolova, përshëndeti bisedën e Mirosllav Lajçakut me politikanë të Kosovës.
“Një komunikim i parë i mirë dhe inkurajues i Mirosllav Lajçakut me politikanët e Kosovës në lidhje me rifillimin e dialogut Prishtinë-Beograd dhe përgjigjen ndaj Covid-19”, shkroi ajo në Twitter. /tesheshi.com/
