Kampionati Europian hyn në fazën e dytë të tij, me takimet e një të tetave. Ndryshe nga sfidat në grupe, ku edhe pati lëshime të lojës në ndeshjet e fundit, asgjë e tillë nuk mund të ngjasë në këtë fazë eliminatore. Përfaqësueset kanë vetëm një alternativë: të fitojnë e të vijojnë më tej, ndryshe duhet të kthehen menjëherë në shtëpi.
Tre ndeshje janë për t’u luajtur këtë të shtunë. E para është ajo mes Zvicrës dhe Polonisë, e cila do të zhvillohet në Sent-Etjen, dhe nis në orën 15:00.
Të dy ekipet luajnë për herë të parë në këtë fazë të kampionatit. Zvicra nuk ka mungesa, kurse te Polonia nuk do të jetë përsëri portieri Szczesny, me probleme fizike.
Takimi i dytë në ditën e sotme është Uells – Irlandë e Veriut, që ka si fillim të tij orën 18:00. Stadiumi “Parc des Princes” në Paris do të jetë arena sportive ku do të luhet kjo ndeshje.
Uellsi nuk humbet ndaj Irlandës së Veriut në tetë takimet e fundit mes tyre, dhe miqësorja e fundit, në mars të këtij viti, përfundoi në barazim, 1-1.
Për në orën 21:00 është lënë një përballje mjaft interesante: Kroaci – Portugali. Takimi do të luhet në stadiumin e Lensit.
Kroacia fitoi dy prej ndeshjeve në grup, duke bërë një surprizë teksa mundi Spanjën, e barazoi në sfidën me Çekinë. Kurse Portugalia e kaloi grupin me tre barazime, me vetëm 3 pikë, e me një lojë shpeshherë zhgënjyese.
Carlos Velasco do të jetë gjyqtari i këtij takimi. Spanjolli do të gjykonte takimin mes Shqipërisë dhe Zvicrës. /tesheshi.com/
