Sulmet ajore dhe luftimet në Halep rinisën furishëm me të marrë fund armëpushimi i njëanshëm i shpallur nga Rusia.
Siç njofton Observatori Sirian për të Drejtat e Njeriut, ka patur përplasje të forta midis forcave të regjimit dhe atyre kryengritëse. Sulmet e para ajrore kanë goditur një vijë fronti kyç në jugperëndim të qytetit. Luftimet dhe bombardimet në terren kanë qenë të intensifikuara në pjesën lindore të Halepit.
Gjatë armëpushimit nuk ka patur evakuim të civilëve, sipas zëdhënëses së Komitetit Ndërkombëtar të Kryqit të Kuq në Siri, Ingy Sedky, e kjo për shkak të pasigurisë në qytet.
Askush nuk ka mundur të ikë nëpërmjet korridoreve humanitare, i ka deklaruar Reuters-it një zyrtar i kryengritësve, Zakaria Malahifji.
“Numri i vogël i njerëzve që u përpoq të largohej u përball me bombardime dhe nuk mundi të shkonte më tutje,” ka thënë ai.
Përndryshe, rusët dhe sirianët e regjimit i kanë akuzuar kryengritësit në lindje të Halepit për pengim të civilëve për t’u larguar e për përdorimin e tyre si mburojë njerëzore. /tesheshi.com/
