Samiti i eurozonës rinisi punën pas një ndërprerje gjatë së cilës liderët takuan ndaraz kryeministrin e Greqisë, Aleksis Cipras në lidhje me paketën e re të shpëtimit.
Cipras takoi kancelaren gjermane, presidentin francez dhe presidentin e BE-së, në përpjekje për të arritur një marrëveshje këtë të dielë.
Tashmë liderët po punojnë mbi propozimet e sjella nga ministrant e tyre të Financave. Një draft i paketës sugjeron që Greqia të largohet përkohësisht nga eurozona nëse asnjë marrëveshje për paketën e shpëtimit nuk arrihet. Dokumenti prej katër faqesh thotë se “Greqisë duhet t’i ofrohen negociata të shpejta në momentin që është jashtë zonës euro, me mundësinë e ristrukturimit të borxhit”.
Një tjetër sugjerim ka të bëjë me ngritjen e një fondi të pavarur ku të transferohen “asete të vlefshme greke… që do të privatizohen me kalimin e kohës si dhe zbritje të borxhit”.
Dokumenti vë në dukje se Greqia ka rënë dakord të paraqesë ligje të reja deri të mërkurën me reforma për taksat dhe pensionet, mes të tjerash. Gjithashtu, në dokument thuhet se qeveria greke do të ndërmarrë reforma ambicioze në reformën e pensioneve dhe tregun e punës, duke përshkallëzuar në të njëjtën kohë në mënyrë domethënëse programin e privatizimit dhe do të forcojë sektorin financiar.
Dokumenti vë re se shuma e paketës së re të ndihmës do të arrijë në 86 miliardë euro, shumë më tepër sesa 53.5 miliardë euro të kërkuara nga Greqia për të mbuluar borxhin deri në vitin 2018. /tesheshi/
