Ky sezon është shumë i rëndësishëm në Shqipëri. Prej 20 vitesh është mbjellë hashas nga veriu në jug sipas periudhave, duke e kthyer vendin në një nga prodhuesit e rëndësishëm në kontinent.
Por vitin e shkuar në Shqipëri nuk u mboll mariuanë, pas një mbulimi centimetër për centimetër në të gjithë vendin.
Megjithatë që të flitet për rezultate në verë, duhet parë çfarë bëhet tani.
Edhe pas kërcënimit dhe paralajmërimit se policia do të monitorojë çdo fshat, prodhuesit e rëndësishëm në vend, kryesisht në alpe dhe në zonën e malësisë së Dibrës e Burrelit kanë tentuar të mbjellin kanabis sativa.
Burime policore theksojnë se në Dukagjin ka pasur një përpasje të fortë të policisë me një grup të njohur hashashi.
Në Dukagjin, edhe pas paralajmërimit të numrit dy të policisë, një grup i fuqishëm, që duket ka lidhje të forta në politikë ka kujtuar se ajo thirrje s’është për të dhe ka blerë farat, e ka transportuar gati për ta mbjellë. Por policia nuk e ka lënë dhe e ka ndjekur. Ka pasur betejë.
Grupi i “kapove jeshile” kanë guxuar edhe t’i shmangen postobllokut të policisë që po i priste në rrugën Shkodër-Dukagjin.
Ata janë futur tek ura e Mesit dhe më pas kanë marrë rrugën malore të Shllakut, pjesë e bashkisë Vau Dejës.
Nga aty ky grup bashkë me materialet dhe mjetet për kultivim kanë mbërritur në fshatin Drisht të Postribës. Përmes urës së telit kanë menduar që ngarkesën që ju duhej për të nisur kultivimin ta kalonin me krahë fizikisht përmes urës së telit duke ecur në këmbë.
Në anën tjetër të urës sipas planit do shkonte një tjetër makinë për të marrë personat dhe materialet për kultivim për t’i çuar më pas drejt Dukagjinit.
Në operacion ka qene prezent drejtori policisë së Shkodrës Vehbi Bushati, të cilit Fatmir Xhafa i ka dhënë një propozim: nuk dua asnjë rrënjë në Dukagjin, ndryshe jep dorëheqjen.
Forcat e policisë janë vënë në ndjekje dhe kanë ndaluar që fara të mbërrijë në Mal.
Po i njëjti operacion mësohet se është zhvilluar edhe në Mat e Dibër.
Një burim policor tha se në terren janë prezent edhe oficerë amerikanë dhe të policisë gjermane.
Ndërkaq, Guardia di Finanza ka dërguar avionët e monitorimit në të gjitha parcelat e njohura për të parë nëse ka nisur mbjellja. /tesheshi.com/
