Autobusët dhe autoambulancat kanë rinisur të lëvizin nga pjesa lindore e Halepit. Më së paku 350 njerëz mësohen ta kenë lënë atë në orët e vona të së dielës.
Më shumë se 1.000 të tjerë u evakuuan mëngjesin e së hënës, pas orësh të tëra shtyrjeje. Mbi 30 autobusë të mbushur me njerëz kanë pritur përgjatë natës nën temperatura të akullta. Largimi është kushtëzuar me nisjen e evakuimit nga dy fshatra në veriperëndim të Sirisë e nën kontrollin e kryengritësve.
Po këtë të hënë ka nisur dhe evakuimi nga ato pjesë të Idlibit të rrethuara nga kryengritësit, në kuadër të marrëveshjes për evakuim.
Në Këshillin e Sigurimit të OKB-së, raporton BBC-ja, thuhet të jetë arritur një kompromis për ta lejuar OKB-në ta mbikëqyr operacionin e evakuimit.
Rusia kishte paralajmëruar më herët veton mbi një projektrezolutë të Francës për të njëjtën çështje.
“Shpresojmë të votohet njëzëri për këtë tekst,” ka thënë ambasadorja amerikane në OKB, Samantha Power.
Këshilli i Sigurimit i OKB-së do të mblidhet sot për të diskutuar e votuar mbi mbikëqyrjen e evakuimit. /tesheshi.com/
